S.Qonaqbaevty Máskeý-1980 Olımpıadasynda qapy qaldyrǵan ıtalıandyq tanymal boksshy Olıva Patrıtsıo Astanaǵa keldi

Chempıonat aldyndaǵy baspasóz máslıhatynda ol burynǵy dosy Serik Qonaqbaevpen birge ıyqtasyp otyryp, ótkendi eske aldy.

«Men úshin osynda Sizdermen birge otyrǵanym úlken qurmet. Meniń eski joldasym Serik Qonaqbaevqa shaqyrýy úshin rahmet! Men onyń shaqyrýyn oılanbastan qabyldadym, sebebi bastan ótkergen qyzyqty sátterimizdi eske alýdy bylaı ysyryp qoıǵannyń ózinde, onymen kórisýdiń ózi úlken baqyt. Serik meniń júregimde máńgi qalady. Ol men úshin mańyzdy adam. Áýesqoı boksshylar arasynda chempıon atanǵanymda - bul zor qurmet boldy. Sondyqtan sondaǵy qýanyshymnyń bir tátti esteligi Serik bolyp qaldy. Ár kezde de ony bokstyń naǵyz mamany dep bilemin. Serik ańyz sportshy ǵana emes, saıasatta da, adam retinde de úlken tulǵa bolyp qalyptasqan jan. Qazir ol Qazaqstan boks federatsııasynda ókildik etedi. Ony federatsııa jumysynda úlken jetistikter kútip turǵanynda kúmánim joq», - dedi ol alǵysózde.

Sonymen qatar ıtalıandyq ardager Álemge shlemsiz boks chempıonatyn ótkizýdi qaıta alyp kelgen Qazaqstannyń tyń bastamasyna da óz pikirin bildirdi.

«Áýesqoı boksta shlemsiz judyryqtasý sátine jetkenimiz de qýantýda. Tek osy jaǵdaıda ǵana boks kánigi óner bolady», - dedi O.Patrıtsıo.         

Qazirgi ýaqytta Olıva Patrıtsıo jeke kásipker. Atap aıtqanda, shetelge Italııada jasalǵan taýarlardy satýmen jáne aqparattyq tehnologııalar transfertimen aınalysady.

«Kórsetilim kezdesýge shoý retinde Serik Qonaqbaevpen jekpe-jek ótkizýge shaqyrsa, Siz keliser me edińiz» degen saýalǵa O.Patrıtsıo: «Bizdiń kezdesýimizdi tek keshki as ústinde, dastarhan basynda ǵana kórýge bolatyn shyǵar», - dep qaljyńdady. Oǵan Serik Qonaqbaev ta bolysyp, «Spagettı jep otyryp, kórip qalýlaryńyz múmkin», - dep jınalǵan jýrnalısterdi dý kúlkige qaryq qyldy.