S.Qonaqbaev: Búginde Azııada bokstan eki erler quramasy ǵana lıtsenzııanyń tolyq jıyntyǵyna ıe
ASTANA. QazAqparat - Ázerbaıjan astanasy Baký qalasynda Halyqaralyq áýesqoı boks qaýymdastyǵynyń (AIBA) uıymdastyrýymen bokstan Olımpıadalyq irikteý týrnıri ótip jatyr. Oǵan 92 eldiń 375 boksshysy qatysýda. Bul týraly Azııalyq boks konfederatsııasy habarlady.
AIBA vıtse-prezıdenti, Azııalyq boks konfederatsııasynyń prezıdenti Serik Qonaqbaev: "Bul jarys Rıo olımpıadasy aldyndaǵy sońǵy irikteý kezeńi. Onda 39 lıtsenzııa oınatylady. Azııa qurlyǵynan júzge jýyq myqty boksshy qatysyp jatyr. Olar lıtsenzııany barynsha kóp alýǵa qol jetkizedi dep úmittenemiz. Bokstyń damýy men básekelestiktiń kúsheıýine baılanysty bul óte qıyn", - dedi.
- Búgingi tańda Azııa óńiriniń eki erler quramasynda barlyq 10 salmaq dárejesi boıynsha tolyq lıtsenzııalar jıyntyǵy bar. Bular - Qazaqstan men Ózbekstan komandalary. Eki el de bylǵary qolǵap sheberleri myqty derjavalar jáne olardyń sporttyń bul túrinde senimdi orny bar, - dep atap ótti Serik Qonaqbaev.
Týrnır 2016 jyly 16 maýsymda bastaldy jáne 25 maýsymda aıaqtalady.
