S.Isaev tildiń tórkinine, etımologııalyq sıpatyna tereńdep, kóptegen qazaq sózderiniń syryn ashty - akademık Ómirzaq Aıtbaıuly
ALMATY. 29 naýryz. QazAqparat - Qanaty maırylyp, eńsesi túsken tilimizdiń eńkeıip baryp es jııýyna septik jasap, til alańynda maıdangerlik tanytqan azamattardy bul kúnderi bireý bilse, bireý bilmeıdi.
Solardyń biri - QR Joǵary mektep ǵylym akademııasynyń jáne QR Jaratylystaný ǵylymdary akademııasynyń akademıgi, QR UǴA-nyń korrespondent-múshesi, fımlologııa ǵylymynyń doktory Seıilbek Isaev. Bul týraly QR UǴA akademıgi, fılologııa ǵylymynyń doktory, professor Ómirzaq Aıtbaıuly búgin Almatyda ótip jatqan «QR Bilim berý salasyndaǵy memlekettik til: qazirgi ahýaly jáne mádenıetaralyq yqpaldastyq máseleleri»taqyrybynda halyqaralyq ǵylymı-tájirıbelik konferentsııada aıtty.
«S. Isaev negizinen tildiń ǵylymı máselelerine den qoıady. Ásirese onyń nazaryna qazirgi til qoldanysyndaǵy túıindi máseleler iligedi. Ol qazaqtyń merzimdi baspasóz tiliniń damýy deıtin máseleni zerttep, ony kandıdattyq deńgeıge jetkizip, qorǵady. 80-jyldardyń ekinshi jartysy men 90-jyldarda jazylǵan eńbekterine qarap otyrsaq, onyń memlekettik tilimizdiń jekelegen naqty máselelerine tereńdeı túskenin ańǵarý qıynǵa soqpaıdy», - dedi Ó.Aıtbaıuly. Onyń aıtýynsha, S.Isaev ásirese tildiń tórkinine, etımologııalyq sıpatyna tereńdep, kóptegen qazaq sózderiniń syryn ashty. «Tórkin sóziniń tórkini», «Jaýbúırek sóziniń etımologııasy», «Sharbaq sóziniń shyǵý tórkini» jáne t.b. tolyp jatqan sózderdiń syryn biz osy Seıilbek zertteýleri arqyly ashtyq desek artyq bolmas. Sondaı-aq, ol bul jyldary ádebı til tarıhy, til mádenıeti, ádebı til normalary jáne qazaq tilindegi negizgi grammatıkalyq uǵymdar máselesine úńiledi. Oıǵa jeteleıtin mazmundy maqalalaryn jazady. Ómirzaq Aıtbaıulynyń ózine qaraǵanda: «Seıilbek Muhamedjaruly tilimizdegi jekelegen sózderdi saralaýmen ǵana shektelmeı, onyń estetıkalyq problemalaryna da boılaıdy. Qazaq tiliniń maqal-mátelderi, turaqty tirkesteri, frazeologızmderi men ıdıomalary tárizdi eń shuraıly, beıneli, syrly da nurly sózderi jaıynda ózindik shymyr taldamalaryn usynady. Mine bul bolashaq áıgili til mamanynyń memlekettik tilimizdiń keńirek qanat jaıyp, óris ashýyna tıgizgen ózindik qolǵabysy bolatyn. Munyń bári sóz joq, ásirese ǵajaıyp tilimizdiń qyr-syryn áli bile qoımaǵan jas urpaq úshin óte qajetti materıaldar bolyp tasqa basylyp qaldy».
