«S-Group» qarjy pıramıdasy 136 mln teńgeden astam zalal keltirdi

ASTANA. KAZINFORM – QMA Astana qalasy boıynsha departamenti «Sincere Systems Group LTD» («S-Group») qarjy pıramıdasynyń qurylymdyq bólimshesin uıymdastyrý jáne basqarý faktisi boıynsha tergeý júrgizip jatyr. Bul týraly Qarjylyq monıtorıng agenttigi habarlady.

«S-Group» kompanııasy ózin Ulybrıtanııadaǵy ınvestıtsııalyq qor retinde tanystyryp, Forex naryǵynda senimgerlik basqarý, maınıng jáne SWP, SWCT ishki krıptotokenderimen saýda júrgizý qyzmetterin usynatynyn málimdegen. Salymshylarǵa aıyna 15%-20%, jylyna 120%-180% kóleminde tabys ýáde etilgen.

Investıtsııalyq qyzmettiń shynaıy júrgizilip jatqandaı kórinýi úshin qatysýshylarǵa kompanııanyń saıtyndaǵy jeke kabınetke qoljetimdilik berilgen, onda vırtýaldy depozıtter, «tabystyń ósimi» jáne eseptelgen qarajat kórsetilgen. Alaıda is júzinde salymshylardyń qarajaty ınvestıtsııalanbaǵan, kúdiktilerdiń jeke qajettilikterine jumsalǵan.

Keltirilgen zalaldyń jalpy somasy 136 mln teńgeden asty.

Qylmystyq jolmen alynǵan tabysqa uıymdastyrýshylar elordada 2 páter jáne 2 avtokólik satyp alǵan, olardy múmkin bolatyn tárkileýden jasyrý maqsatynda senimdi tulǵalardyń atyna rásimdegen.

Sot sanktsııasymen atalǵan múlikke tyıym salyndy.

Kúdiktilerge qatysty bultartpaý sharasy retinde elden shyqpaý jáne tıisti minez-qulyq týraly qolhat qoldanyldy.

Tergeý jalǵasyp jatyr.

QR QІJK-niń 201-babyna sáıkes ózge aqparat jarııalaýǵa jatpaıdy.

Aıta keteıik, Qaraǵandyda «Úmit Samǵaý» qarjy pıramıdasyn uıymdastyrǵandar tergelip jatyr.