S. Gromov Senat tóraǵasynyń orynbasary qyzmetine saılandy

ASTANA. QazAqparat - Búgin Parlament Senatynyń jalpy otyrysynda senator Sergeı Gromov Senat tóraǵasynyń orynbasary qyzmetine saılandy. Eske sala keteıik, jalpy otyrysta Qaırat Işanov óz ótinishi boıynsha qyzmetinen bosatylǵan bolatyn.

«Maǵan berilgen konstıtýtsııalyq normalardy paıdalana otyryp, Senat tóraǵasynyń orynbasary qyzmetine Sergeı Gromovtyń kandıdatýrasyn usynamyn. S. Gromovty tanystyryp jatýdyń qajeti joq dep oılaımyn», dedi spıker Q. Toqaev.

Senat reglamentine sáıkes, tóraǵa orynbasary palata depýtattarynyń ashyq daýys berýimen saılanady. Osyǵan oraı, palata depýtattary atalǵan máseleni qoldap, biraýyzdan daýys berdi.

Osylaısha, S. Gromov tóraǵa orynbasary qyzmetine saılanyp, jumysyna birden kiristi.

S. Gromov 1959 jyly 6 qańtar aıynda týǵan, ulty orys. Bilimi joǵary. Jambyl gıdromelıoratsııa-qurylys ınstıtýtyn, Almatynyń polıtologııa jáne basqarý ınstıtýtyn, «Aýlıe-Ata» ýnıversıtetin bitirgen, ekonomıka ǵylymdarynyń kandıdaty.
Ár jyldary: assıstent, oqytýshy, Instıtýttyń komsomol hatshysy raıkomnyń birinshi hatshysy, sovhoz partkomynyń hatshysy, bas dırektor, aýdan ákimi, Ońtústik Qazaqstan oblysy ákiminiń birinshi orynbasary, Prezıdent Ákimshiliginiń ınspektory, «Nur Otan» halyqtyq-demokratııalyq partııasynyń Ortalyq apparatynyń jetekshisi, «Nur Otan» halyqtyq-demokratııalyq partııa tóraǵasynyń orynbasary, «Nur Otan» halyqtyq-demokratııalyq partııasynyń hatshysy, Qazaqstan Respýblıkasynyń Qorǵanys mınıstriniń orynbasary bolyp jumys atqarǵan.