S gepıtıtine shaldyqqandardy emdeýge arnalǵan dári-dármektiń alǵashqy partııasy Qazaqstanǵa jetkizildi
ASTANA. Naýryzdyń 29-y. QazAqparat /Gúlmıra Álıakparova/ - S gepıtıtimen aýyratyn naýqastarǵa kepildendirilgen tegin medıtsınalyq kómek aıasynda berilýi tıis preparattardyń alǵashqy partııasy Qazaqstanǵa jetkizildi. Bul týraly búgin jýrnalıstermen ótken baspasóz máslıhatynda dári-dármekti jetkizýshi «Medservıs+» kompanııasynyń bas dırektory Janat Omarov málim etti,
dep habarlaıdy QazAqparat.
J.Omarovtyń aıtýynsha, kepildendirilgen tegin medıtsınalyq kómek aıasynda tapsyrylǵan «Interferon alfa» (Roferon) preparatyn Qazaqstanǵa jetkizý boıynsha búgin, «SK-Farmatsııa» JShS-men kelisimshartqa qol qoıyldy. «Dáriniń alǵashqy 3 myń danasy kedendik beketterge jetti. Bir aptanyń kóleminde ol naýqastarǵa jetetin bolady», - dep atap ótti ol.
Aıta keteıik, Densaýlyq saqtaý mınıstrligi «SK-Farmatsııa» JShS-ǵa S gepatıtine shaldyqqan naýqastardy kepildendirilgen tegin medıtsınalyq kómek sheńberinde emdeý úshin 2010 jylǵa «Interferon alfa» (óndirýshi Shveıtsarııa) dári-dármeginiń barlyǵy 135 myń 720 dana shprıts-tıýbıgine tapsyrys berdi. Memleketten bul tapsyrysqa barlyǵy 550 mıllıon teńge bólindi.
Óz kezeginde «SK-Farmatsııa» JShS bas dırektorynyń orynbasary Janaıdar Mýsın, «Medservıs+» kompanııasy atalmysh preparatty Qazaqstan Respýblıkasyna jetkizýmen buǵan deıin de aınalysqanyn atap ótti.
«Interferon alfa» burynǵydaı monoterapııa retinde qoldanyla beredi, biraq bıyl bul preparatpen «Rıbovırın» (Rebetol) suıyq dárisi (sırop) qosymsha taǵaıyndalatyn bolady. Qazir ony Qazaqstanda tirkeý jáne jetkizý boıynsha Densaýlyq saqtaý mınıstrligimen kelissózder ótti. «Medservıs +» kompanııasy alǵashqy ýaqytta bul preparatty óziniń qoımadaǵy qorynan berýge kelisti. Keıin, ol boıynsha bólek kelisimsharttar jasalatyn bolady», - dedi ol.
Baspasóz máslıhatynda atap ótilgendeı, arnaıy tapsyryspen Kanadada jasalatyn «Rıbovırın» preparatyn Qazaqstanda tirkeý jumystary eki-úsh aı ýaqytty alady. Onyń bir jylǵa berilip otyrǵan tapsyrys kólemi - 12 myń dana.
