S gepatıtine qarsy dári-dármekter Qazaqstanǵa 1,5-2 aıdyń kóleminde jetkiziledi - J.Dosqalıev
STANA. Naýryzdyń 26-sy. QazAqparat /Gúlmıra Álıakparova/ - S gepatıtine shaldyqqan naýqastarǵa kepildendirilgen tegin medıtsınalyq kómek sheńberinde berilýi tıis dári-dármekterge memlekettik satyp alýlar aıaqtaldy.
Bul týraly búgin jýrnalısterdiń suraqtaryna jaýap bergen Jaqsylyq Dosqalıev málim etti, dep habarlaıdy QazAqparat.
«Búgingi kúni tender aıaqtaldy jáne konkýrstyń nátıjesi shyǵaryldy. Balalarǵa qajetti dári-dármekter 1,5-2 aıdyń kóleminde Qazaqstanǵa jetkiziletin bolady», - dep atap ótti ol.
Mınıstrdiń aıtýynsha, S gepatıtine qarsy preparattarmen tek leıkemııamen aýyratyn balalar ǵana emes, sondaı-aq aǵzasynda gepatıt juqpasynyń atalmysh túri bar barlyq naýqastar júz paıyz qamtamasyz etiletin bolady. «Olardyń barlyǵy tegin emdeledi jáne aldaǵy ýaqytta medıtsınalyq mamandardyń qatań baqylaýynda bolady. Retsıdıv bolǵan jaǵdaıda tıisti medıtsınalyq kómek kórsetiledi», - dedi J.Dosqalıev.
Aıta keteıik, ótken jyldyń sońynda Almatydaǵy Pedıatrııa jáne balalar hırýrgııasy ǵylymı ortalyǵynda leıkemııa dıagnozymen emdelip jatqan balalardyń ata-analary, óz balalarynyń ortalyqta gepatıttiń S vırýsyn juqtyrǵandyǵy týraly málimdegen bolatyn. Al taıaýda osy ata-analar kepildendirilgen tegin medıtsınalyq kómek aıasynda S gepatıtine qarsy berilýi tıis preparattardyń joqtyǵyn aıtqan edi.
