S gepatıtin juqtyrý sebebin tergeýmen baılanysty qan tapsyrýǵa qatysqan árbir donor tekserilýde
ASTANA. Mamyrdyń 27-si. QazAqparat /Marlan Jıembaı/ - Elimizde S gepatıtin juqtyrý sebebin tergeýmen baılanysty qan tapsyrýǵa qatysqan árbir donardy tekserý bastaldy.
Bul týraly búgin QR Bas prokýratýrasynyń resmı ókili Nurdálet Súıindikov BAQ ókilderimen bolǵan baspasóz máslıhaty barysynda málim etti.
Aǵymdaǵy aıda QR Bas prokýratýrasy atalǵan jaıtqa oraı aldyn ala qorytyndy shyǵarǵanyn, alaıda ol medıtsınalyq qyzmettiń is-áreketterine birjaqty quqyqtyq baǵa berý úshin senimdi negiz bola almaǵandyǵyn aıtqan ol: «aldyn ala qorytyndylar jan-jaqty zerdelengennen keıin bizdiń tarapymyzdan aýmaqtyq prokýrorǵa tekserýdi jalǵastyrý týraly qosymsha tapsyrma berildi. Qazirgi ýaqytta maǵan belgili bolyp otyrǵany, prokýrorlar eki taraptyń da jaǵdaıdy túsindirýge tyrysýyn boldyrmaý úshin qan tapsyrý úrdisine qatysqan respýblıkanyń árbir donoryn tekserýdi júrgizip jatyr», dedi.
Onyń atap ótýinshe, donorlardy tekserý barysyna memlekettik densaýlyq saqtaý organdarymen qatar táýelsiz medıtsınalyq uıymdardyń sarapshylary da qatysýda.
