S. Bilálov Senattyń turaqty komıtetiniń múshesi bolyp saılandy
ASTANA. 28 naýryz. QazAqparat - Senat depýtaty Serik Bilálov Parlament Senatynyń Tabıǵatty paıdalaný jáne aýyldyq aýmaqtardy damytý turaqty komıtetiniń múshesi bolyp saılandy. Búgin Senattyń jalpy otyrysynda palata depýtattary osyndaı sheshim qabyldady.
Eske salsaq, buǵan deıin senator Samat Eskendirov Soltústik Qazaqstan oblysyna ákim bolyp taǵaıyndalyp, óz ókilettigin toqtatqan bolatyn. Al, onyń ornyna S. Bilálov atalǵan óńirden Senat depýtattyǵyna saılandy.
Bilálov Serik Sultanǵazyuly 1958 jyly Soltústik Qazaqstan oblysy Býlaev aýdanynyń Sarytomar aýlynda dúnıege kelgen.
Tselınograd aýyl sharýashylyq ınstıtýtyn (1983 j.), Almaty ekonomıka jáne statıstıka ınstıtýtyn támamdady (1998 j.), zooınjener, ekonomıst.
Eńbek qyzmetin 1974 j. SQO Vozvyshenks aýdany, «Molodogvardeıtsev» atyndaǵy sovhozdyń mal sanıtary bolyp bastap, keıin Beskól aýdany «Andreevskıı» keńshary bólimshesiniń zootehnıgi bolyp jumys istedi. Soltústik Qazaqstan oblysynyń keńsharlarynda bas zootehnık, Sovet aýdany «Aralaǵash» keńsharynyń dırektory bolyp istedi.
1992 j. «Beskól qus fabrıkasy» ABAQ bas zootehnıgi, odan keıin prezıdenti bolyp istedi.
1999 j. bastap Soltústik Qazaqstan oblysy Býlaev (qazirgi Maǵjan Jumbaev), Esil, Qyzyljar aýdandarynyń ákimi.
2007 j. sáýirine deıin Soltústik Qazaqstan oblysynyń Qyzyljar aýdanynyń ákimi bolyp jumys istep, sáýir aıynan Soltústik Qazaqstan oblysy ákiminiń orynbasary laýazymyn atqarǵan.
2007 j. 9 qazanda Soltústik Qazaqstan oblysynyń ákimi bolyp taǵaıyndaldy.
«Nur Otan» halyqtyq-demokratııalyq partııasynyń múshesi, Senat depýtattyǵyna saılaný barysynda - ýaqytsha jumyssyz.
