S.Berdiqulov atyndaǵy syılyqtyń ıegerleri anyqtaldy - jýrnalıster arasyndaǵy baıqaý qorytyndysy
ASTANA. 5 qańtar. QazAqparat - QR Týrızm jáne sport mınıstrliginiń Sport komıteti dene tárbıesi jáne sport taqyryptaryn qalamdaryna arqaý etken otandyq BAQ ókilderi arasynda ótken S.Berdiqulov atyndaǵy syılyqqa arnalǵan baıqaýdyń qorytyndysyn shyǵardy.
Bul týraly Shtattyq ulttyq komandalar jáne sporttyq rezerv dırektsııasynyń baspasóz qyzmetinen habarlady.
Sport jýrnalısi, kósemsózshi jáne qoǵam qaıratkeri Seıdahmet Berdiqulov atyndaǵy syılyqqa úmitker retinde buǵan deıingi baıqaýlarǵa qatyspaǵan jýrnalıster baq synaı aldy. 2011 jyldyń 1 qazany men 1 jeltoqsany aralyǵynda ótken baıqaýǵa elimizdiń 15 jýrnalısi qatysty.
Baıqaý erejesine sáıkes syılyq úsh izdenýshige beriledi. Onyń ekeýi memlekettik tildiń mártebesin arttyrý maqsatyn tutqan qazaq tilindegi materıaldarǵa, úshinshisi orys tilinde jaryq kórgen maqalaǵa tabystalady.
Quramyna tanymal sport jýrnalısteri, qoǵam qaıratkerleri, Sport komıtetiniń qyzmetkerleri kirgen komıssııa qorytyndysy boıynsha, 2011 jylǵa arnalǵan S.Berdiqulov syılyǵy «Egemen Qazaqstan» gazetiniń tilshisi Dastan Kenjalınge, «Qazaqstan» telearnasynyń tilshisi Dına Ysqaqovaǵa jáne «Astana sport» gazetiniń tilshisi Janar Óteshovaǵa berildi.
Konkýrs jeńimpazdaryna dıplomdar, aqshalaı syıaqylar jáne «Seıdahmet Berdiqulov atyndaǵy syılyqtyń laýreaty» tósbelgileri tabys etiledi.
