S.Begalın atyndaǵy Memlekettik balalar kitaphanasy 60 jyldyǵyn atap ótýde

Búginde S.Begalın atyndaǵy Memlekettik balalar kitaphanasy - eń iri balalar kitaphanasy bolyp tabylady. Onda 11 bólim, onyń altaýy paıdalanýshylarǵa tikeleı qyzmet kórsetedi. Kitaphana qorynda jarty mıllıonǵa jýyq kitaptar, CD, aýdıo jáne vıdeo málimetter bar. Begalınkanyń oqyrmandaryna aqparattyq bilim berý medıatsentri «Bilim álemine ashylǵan tereze» qyzmetin usynady. Jyl saıyn munda 15 myńǵa jýyq oqyrmandar keledi. Bul jerde bári balalarǵa yńǵaıly túrde jasalǵan.

Kitaphana ujymy mereı toıdyń respýblıka ómirindegi eń ulyq mereke el táýelsizdiginiń 20 jyldyǵy qarsańyna kelgenine qýanyshty.

"S.Begalın atyndaǵy Memlekettik balalar kitaphanasy 1951 jyly mamyr aıynyń 10 juldyzynda quryldy. Kitaphana Keńes Odaǵyndaǵy alǵashqy respýblıkalyq kitaphana bolyp sanaldy. Bul dáreje 60 jylǵa jýyq saqtalyp keldi, qazirdiń ózinde biz balalarǵa qyzmet kórsetetin respýblıka kitaphanalaryna ádistemelik jáne praktıkalyq qyzmet kórsetýde úılestirýshi mindetin atqaryp kelemiz. 60 jyl ishinde kitaphananyń shyǵarmashylyq joly jas býynnyń adamgershilik, rýhanı tárbıesine úlken úles qosyp keledi",- dedi kitaphananyń dırektory Sofııa Raeva.

Onyń aıtýynsha, búginde balalardyń kitapqa degen qyzyǵýshylyǵy artyp, kitaphanaǵa kelýshilerdiń sany kóbeıgen.

Jarty ǵasyrdan astam tarıhy bar balalar kitaphanasy búgin mereı toılyq sharalar aıasynda "Balalardyń oqýy - rýhanı baılyq" atty ǵylymı praktıkalyq konferentsııa ótkizýde. Oǵan balalar ádebıeti salasyndaǵy jetekshi mamandar, balalar oqýy suraqtarymen aınalysatyn pedagogtar, memlekettik emes uıymdar men halyqaralyq qordyń ókilderi, jaqyn jáne alys shetelderden kelgen kitaphana mamandary qatysýda. Konferentsııada balalar ádebıetine qatysty máseleler talqylanatyn bolady.

Sofııa Raevanyń aıtýynsha, jyl boıy kitaphanada mereıtoıǵa arnalǵan taqyryptyq sharalar ótetin bolady.

Erteń kitaphananyń 60 jyldyq qurmetine Jambyl atyndaǵy Qazaq memlekettik fılarmonııada kontsert ótedi.