S. Baımaǵambetov 50 myń AQSh dollary kóleminde para alǵan degen kúdik keltirilýde

Bul týraly búgin elordada QR Ekonomıkalyq jáne sybaılas jemqorlyqpen kúres agenttiginiń resmı ókili Murat Jumanbaı málim etti.

«Agenttik pen QR Qarjy mınıstrligi Kedendik baqylaý komıtetiniń burynǵy tóraǵasy S. Baımaǵambetovke qatysty qyzmettik ýákilettigin teris paıdalaný jáne asa iri mólsherde para alý faktileri boıynsha qylmystyq is tergelýde. Qazirgi tańda S. Baımaǵambetov  Kedendik baqylaý komıtetiniń aýmaqtyq departamentteriniń birine basshylyq laýazymdy taǵaıyndaý úshin 50 myń AQSh dollary kóleminde para alǵan degen aıyp taǵylyp otyr. Ol aǵymdaǵy jyldyń 5 aqpanynda Astana qalalyq sotynyń sanktsııasymen qamaýǵa alyndy. Onyń basqa da jemqorlyq qylmystarǵa qatystylyǵy tekserilýde.  Qylmystyq is tergelýde, ózge aqparattar tergeý múddesine oraı jarııalanbaıdy», - dedi resmı ókil.