S.Asfendııarov atyndaǵy QUMÝ rektory óz erkimen qyzmetinen ketetindigin jarııa etti
ASTANA. QazAqparat - S.Asfendııarov atyndaǵy Qazaq ulttyq medıtsınalyq ýnıversıtetiniń rektory Aıqan Aqanov óz erkimen qyzmetinen ketetindigin málimdedi.
Onyń úndeýi atalǵan bilim ordasynyń resmı saıtynda jarııalandy.
«S.Asfendııarov atyndaǵy Qazaq ulttyq medıtsınalyq ýnıversıtetiniń oqytýshylary, qyzmetkerleri men stýdentteri! Men ótinish jazdym jáne zeınet jasyna jetýime baılanysty óz erkimmen qyzmetimnen ketemin. Jasym 65-ke taqady jáne 2 jyl boıy zeınetaqy alyp kelemin. Bizdiń Prezıdentimiz Nursultan Ábishuly Nazarbaev óte durys aıtady: Zeınetkerler osynaý qıyn-qystaý kezeńde jas qýatty basshylarǵa oryn bosatý tıis. Memleket basshysynyń qoldaýy jáne onyń tapsyrmalaryn oryndaý úshin men 8 jyl boıy bizdiń ýnıversıtetimizge basshylyq jasadym. Ýnıversıtet osy aralyqta múldem ózgerdi», - delingen Aıqan Aqanovtyń úndeýinde.
Sonymen qatar ol bıýdjet qyzmetterin ártaraptandyrýdyń nátıjesinde memleket tarabynan bólinetin qarjy 3,2 mlrd. teńgeden 13 mlrd. teńgege deıin óskenin, stýdentter sany 10 myńnan asqanyn, bilikti pedagogtardyń 1,7 myńǵa jetkenin atap ótken.
«Sońǵy 5 jylda 4651 maman bitirip shyqty. Túlekterdiń 92 paıyzy jumysqa ornalasty. Shynaıy túrde úsh tilde oqytý engizildi. Aǵylshyn tilinde stýdentterdiń 10 paıyzdan astamy, onyń ishinde birinshi kýrs stýdentteriniń úshten biri bilim alýda», -deıdi ýnıversıtet rektory.
