S. Asfendııarov atyndaǵy Qazaq ulttyq medıtsına ýnıversıteti 85 jyldyǵyn atap ótip jatyr
ALMATY. QazAqparat- Almatyda S. Asfendııarov atyndaǵy Qazaq ulttyq medıtsına ýnıversıteti óziniń 85 jyldyq mereıtoıyn atap ótip jatyr.
«Bul mereıtoı kúni búginge deıin atqarylǵan jumystar boıynsha qorytyndy jasaýǵa jáne bolashaqqa jospar qurýǵa múmkindik beredi. Mereıtoıǵa baǵyttalǵan sharaǵa elimizdegi barlyq medıtsınalyq joǵary oqý oryndarynyń rektorlary, sheteldik áriptester, bizdiń túlekterimiz, sondaı-aq Dúnıejúzilik medıtsınalyq bilim berý federatsııasynyń prezıdenti Devıd Gordon keldi», - dedi QazUMÝ rektory, medıtsına ǵylymdarynyń doktory, professor Aıqan Aqanov.
Óz kezeginde QR Densaýlyq saqtaý jáne áleýmettik damý vıtse-mınıstri Erjan Birtanov búginde S. Asfendııarov atyndaǵy Qazaq ulttyq medıtsına ýnıversıtetiniń elimizde jetekshi medıtsınalyq joǵary oqý oryndarynyń biri ekendigin basa aıtty. Bul oqý orny álemniń 43 elinde 100-den astam ǵylymı ortalyqtar men oqý mekemelerimen tyǵyz baılanys ornatqan.
«Memlekettiń ál-aýqaty jaqsaryp, qoǵam jańarǵan saıyn densaýlyqqa qatysty áleýmettik kútim de arta túsedi. Qazirgi tańda elimizde 2016-2019 jyldarǵa arnalǵan jańa «Densaýlyq» memlekettik baǵdarlamasy ázirlengen. Bul mańyzdy qujattyń strategııalyq baǵyttarynyń biri - medıtsınalyq bilim men ǵylymdy odan ári jańǵyrtý. Bul ýnıversıtet, iri joǵary oqý oryndarynyń biri retinde osy baǵdarlamanyń damýyna óz úlesin qosýy tıis. Bul úshin onyń materıaldyq-tehnıkalyq bazasy, professor-oqytýshylyq quramy, tájirıbesi, keń kólemdi halyqaralyq seriktestigi jetkilikti», - dedi vıtse-mınıstr.
Sonymen qatar, E. Birtanov densaýlyq saqtaý júıesin ári qaraı damytý boıynsha birlese atqarylyp jatqan jumystardyń kadrlardy daıarlaýdyń jańa standarttaryn engizýge jáne medıtsınalyq kómek kórsetý deńgeıin attyrýǵa múmkindik beretindigin aıtty.
Aıta ketelik, Qazaqstanda alǵashqy medıtsınalyq ınstıtýt Almatyda 1930 jyly 2-shi jeltoqsanda qurylǵan. Ony alǵashqy dırektory bolyp Imperatorlyq Áskerı-Medıtsınalyq Akademııanyń túlegi Sanjar Asfendııarov taǵaıyndalǵan. Alǵashqy kezde emdeý fakýltetiniń 10 kafedrasy ashylǵan.
Al búginde atalmysh joǵary oqý ornynda 62 klınıkalyq kafedra jumys isteıdi.
