S.Asfendıarov atyndaǵy QazUMÝ men AQSh-tyń Dıýk medıtsınalyq ýnıversıteti ózara kelisimge keldi

ALMATY. QazAqparat - S.Asfendıarov atyndaǵy QazUMÝ men AQSh-tyń Dıýk Medıtsınalyq ýnıversıteti arasynda ózara seriktestikti damytý týraly memorandýmǵa qol qoıyldy. Taraptar 2016-2019 jyldarǵa arnalǵan strategııalyq jáne medıtsınalyq bilimdi basqarý salasynda áriptestik máselelerin talqylady. Jıynǵa QR Densaýlyq saqtaý jáne áleýmettik damý vıtse-mınıstri Eljan Birtanov qatysty.

Vıtse-mınıstr 2016-2019 jyldarǵa arnalǵan medıtsınalyq bilim berýdi jańǵyrtý jobasy aıasyndaǵy maqsat-mindetter týraly aıtyp berdi.

«Atalǵan baǵdarlama aıasynda 3 maqsatty júzege asyrý kózdelip otyr. Eń birinshisi - halyq densaýlyǵyn qorǵaýda jańa saıasatqa bet burý, odan keıin qazirgi júıeniń tıimdiligin arttyrý kózdelip otyr. Onyń ishinde mindetti medıtsınalyq saqtandyrý júıesin engizý, qarjylandyrýdyń jańa júıesin engizý óz jemisin beredi dep senemiz. Úshinshiden, mamandar potentsıalyn arttyrý basty maqsat. Bizdiń áriptes JOO-lar bizge medıtsınalyq oqý oryndaryn qalaı tıimdi basqarýdyń usynymdaryn beredi degen úmittemiz. Sol arqyly OPQ, stýdentter sapasyn arttyrý maqsat tutylyp otyr», - dedi E.Birtanov.

Óz kezeginde Dıýk Ýnıversıtetiniń jahandyq medıtsına ortalyǵynyń strategııa men áriptestikti damytý boıynsha dırektory Lıza Býrje de eki oqý orny arasyndaǵy áriptestik óz jemisin beretinine senim bildirdi.

«Osynda kelgendegi basty maqsatym - jergilikti medıtsınalyq bilim berý deńgeıiniń qanshalyqty ekendigin baıqaý. Saparym barysynda bizdiń oqý oryndarynyń qaı tusta seriktestik ornata alatyndyǵyn anyqtadym. Osynda kelgen 3 kún ishinde biz bolashaq yntymaqtastyqtyń irgetasyn qaladyq», - dedi Lıza Býrje.