S. Aqylbaı Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy bolyp saılandy
ASTANA. 27 qańtar. QazAqparat /Qanat Mámetqazyuly/ - Búgin Senat Tóraǵasy Qaırat Mámıdiń jetekshiligimen Parlament Senatynyń jalpy otyrysy ótip,
onda palata depýtattary Konstıtýtsııalyq zańnama, sot júıesi jáne quqyq qorǵaý organdary komıtetiniń jańa tóraǵasyn saılady.
Esterińizge sala keteıik, buǵan deıin Elbasynyń Jarlyǵymen senator Berik Imashev Ádilet mınıstri qyzmetine taǵaıyndalǵan bolatyn. Soǵan baılanysty jańa mınıstrdiń depýtattyq ókilettigi toqtatylǵan edi.
Osyǵan oraı, B. Imashev Senattyń Konstıtýtsııalyq zańnama, sot júıesi jáne quqyq qorǵaý komıtetiniń tóraǵasy qyzmetinen de bosatyldy. Onyń ornyna senatorlardyń usynysymen depýtat Serik Aqylbaı komıtet tóraǵasy bolyp saılandy.
Spıker B. Imashevtyń zań shyǵarmashylyǵy jumysyndaǵy qyzmetin joǵary baǵalap, buǵan deıingi Senat depýtattyǵynda jınaqtaǵan tájirıbesin keıingi jaýapty qyzmetterinde paıdalanatyndyǵyna senim bildirdi. «Ádilet mınıstrligin jańa deńgeıge kóterip, aldaǵy ýaqytta da Parlamentpen tyǵyz baılanysta bolady dep senemiz», - dedi Q. Mámı.
