S. Ahmetovtyń Premer-Mınıstr qyzmetine taǵaıyndalýy Úkimettiń búgingi jumysyna berilgen joǵary baǵa - M. Ábenov
Búgin QR Parlamenti Májilisinde Memleket basshysy N. Nazarbaev Premer-Mınıstr kandıdatýrasyna Serik Ahmetovti usynyp, ony tómengi palata depýtattary biraýyzdan qoldaǵan bolatyn. Osyǵan oraı QazAqparat tilshisine pikirin bildirgen depýtat Murat Ábenov osylaı málim etti.
«Meniń oıymsha, Prezıdenttiń usynysymen Serik Ahmetovtiń taǵaıyndalýy búgingi Úkimettiń durys baǵytta júrip kele jatqanyn, atqarylyp jatqan jumys sapasyn baǵalaý dep esepteımin. Sebebi, Úkimet basshysyn jańa qyzmetke aýystyryp, ony aýystyrar kezde qyzmetin baǵalap, orynbasaryn sol bılikke ákelýiniń ózinde úlken mán jatyr. Jalpy bir basshyny joǵarylatyp, onyń ornyna orynbasaryn taǵaıyndaý osy saladaǵy jumystardyń nátıjeli ekendigin bildirse kerek», - dedi Murat Ábenov.
Onyń aıtýynsha, jańa Úkimet qolǵa alynǵan ındýstrııalyq-ınnovatsııalyq saıasatty jalǵastyratyn bolady. «Indýstrııalyq jobalardyń, baǵdarlamanyń 10-12 jylǵa mejelengen ýaqyty bar. Sonyń jartysyn Másimov Úkimeti bitirip ketti. Al S. Ahmetov týra sol qarqynmen bastalǵan isti sapaly aıaqtaıdy degen úmit bar», - dedi M. Ábenov.
Esterińizge sala keteıik, Memleket basshysy Nursultan Nazarbaev búgin Qazaqstan Respýblıkasy Parlamenti Májilisiniń otyrysyna qatysyp, onda Elbasy Kárim Másimovke atqarǵan jumysy úshin alǵys bildirdi jáne Qazaqstan Respýblıkasy Premer-Mınıstri qyzmetine Serik Ahmetovtiń kandıdatýrasyn usyndy. Parlament Májilisiniń depýtattary Qazaqstan Respýblıkasy Premer-Mınıstri qyzmetine Serik Ahmetovtiń kandıdatýrasyn qoldaý týraly biraýyzdan sheshim qabyldady.