S.Ahmetovtiń tóraǵalyǵymen ótken keńeste iri qara mal etiniń eksporttyq áleýetin damytý baǵdarlamasynyń oryndalý barysy qaraldy
Bul týraly QR Premer-Mınıstriniń baspasóz qyzmeti habarlady.
Otyrysty ashqan S.Ahmetov Memleket basshysynyń tapsyrmasy boıynsha elimizde eki jyldan beri iri qara mal etiniń eksporttyq áleýetin damytý baǵdarlamasy iske asyp jatqanyn, onyń aıasynda joǵary ónim beretin mal basyn ımporttaý, fermerlik sharýashylyqtarǵa analyq mal basyn satyp alý úshin nesıeler berý, mal bordaqylaý alańdaryn salý isi júrip jatqanyn atap ótti.
QR aýyl sharýashylyǵy mınıstri Asyljan Mamytbekov óziniń baıandamasynda baǵdarlamaǵa bıznestiń belsendi qatysyp jatqanyn, al memleket tarapynan jeńildetilgen nesıe berý men sýbsıdııalaýǵa qatysty barlyq jaǵdaı jasalyp otyrǵanyna toqtaldy.
«Baǵdarlamada 2016 jylǵa deıin 72 myń asyl tuqymdy mal basyn ımporttaý kózdelgen. Mal basyn tasý isi jospardan asyra oryndalýda. Eki jyl ishinde josparlanǵan 22 myń bastyń ornyna 30 myńǵa jýyq asyl tuqymdy mal basy ákelindi. Jańadan 60-qa jýyq asyl tuqymdy mal ósiretin sharýashylyqtar quryldy», - dedi AShM basshysy.
Sondaı-aq, A.Mamytbekov barlyq oblystardyń «Sybaǵa» baǵdarlamasyn iske asyrýǵa belsene atsalysyp jatqanyn atap ótti. Bul oraıda, 2012 jyldyń qorytyndysy boıynsha Almaty, Shyǵys Qazaqstan jáne Qaraǵandy oblystary úzdik shyqty.
Sonymen qatar, eksportqa baǵyttalǵan mal bordaqylaý alańdarynyń qurylysy da qarqyndy júrip jatyr. Eki jyl ishinde 35 200 mal basyna arnalǵan alańdar iske qosyldy.
«Mal sharýashylyǵyn damytýǵa barynsha qoldaý kórsetý úshin memleket tarapynan barlyq jaǵdaı jasalyp jatyr. Biz qabyldaıtyn 2020 jylǵa deıingi agroónerkásip keshenin damytý baǵdarlamasynyń aıasynda qoldaýdyń buryn-sońdy bolmaǵan sharalary qarastyrylyp otyr», - dedi S.Ahmetov.
«Biz qazirgi tańda jahandyq ıntegratsııadamyz, Biryńǵaı ekonomıkalyq keńistikte, Kedendik odaqtamyz, jaqyn arada DSU-ǵa kiremiz. Biz ónimniń baǵasy boıynsha ǵana emes, sonymen qatar sapasy boıynsha da básekege qabiletti bolýǵa daıyn bolýymyz kerek», - dep atap kórsetti ol.
Keńes sońynda S.Ahmetov baǵdarlamanyń oryndalý barysy týraly birqatar oblys ákimderiniń esebin tyńdap, bul baǵyt boıynsha jumys qarqynyn báseńdetpeýdi tapsyrdy.
