S. Ahmetov: Energetıka - el ekonomıkasynyń negizi
ASTANA. 8 qazan. QazAqparat - Energetıka salasy bizdiń elimiz ekonomıkasynyń negizi bolyp tabylady.
Búgin Astanada óz jumysyn bastaǵan «KAZENERGY» munaı-gaz jáne energetıka kesheni uıymdary qaýymdastyǵynyń VIII Eýrazııalyq forýmynyń saltanatty ashylýy barysynda sóz sóılegen QR Premer-Mınıstri Serik Ahmetov osylaı málimdedi.
Sóz arasynda Úkimet basshysy qysqa merzim ishinde Qazaqstandaǵy munaı óndirý 3 eseden asyp, jylyna 80 mln. tonnaǵa jetkenin, al elimizdegi gaz óndirý 5 esege artyp, 40 mlrd. tekshe metr quraǵanyn atap ótti.
«Elbasy aıtqanyndaı, Qashaǵan jobasynyń iske qosylýyn tehnıkalyq progrestegi jeńis retinde qarastyrýǵa bolady. Sonymen qatar, Qazaqstan osy jobamen ǵana shektelip qalmaq emes. Bul rette geologııalyq barlaý - elimizdiń resýrstyq-ındýstrııalyq qýat saıasatynyń mańyzdy basymdyqtarynyń birine aınalatyn bolady», - dedi Úkimet basshysy.
