S.Ahmetov ÁKK basshylaryn qaıta taǵaıyndaý qajettigin aıtty
ASTANA. 16 qazan. QazAqparat - 2014 jyly barlyq áleýmettik-kásipkerlik korporatsııalar shyǵynsyz jumysqa kóshýi qajet.
Búgin Úkimettiń selektorlyq rejimindegi otyrysynda QR Premer-Mınıstri Serik Ahmetov osylaı dedi.
«2014 jyly barlyq áleýmettik-kásipkerlik korporatsııalar jumystyń shyǵynsyzdyǵy deńgeıine shyǵýy qajet. Bul oblys ákimderi tikeleı jaýap beretin mańyzdy aspekt. ÁKK basshylaryn qaıta taǵaıyndaýǵa baılanysty máseleni qaıta qaraý qajet», - dedi Úkimet basshysy.
Sonymen qatar ol ÁKK-lar óńirlerde nebári 2 jyldyń ishinde ǵana shynaıy jumys isteı bastaǵandyǵyn, óıtkeni bul kóshpeli kezeń 2014 jylǵa deıin jalǵasatynyn basa aıtty. «Kelesi kezeń 2015-2020 jyldary aralyǵyndaǵy besjyldyq bolady. Sondyqtan da meniń oıymsha, jańa tujyrymdamany eskere otyryp kóshpeli kezeńde ulttyq kompanııalar mártebesin saqtaý qajet», - dedi S.Ahmetov.
Osy oraıda Úkimet basshysy kóshpeli kezeńde oblys ákimderi ÁKK-lardyń Dırektorlar keńesin basqarýy qajettigine erekshe toqtaldy.
