S. Ahmetov ákimderge «Qoljetimdi baspana- 2020» baǵdarlamasyn tyńǵylyqty oryndaýdy tapsyrdy
ASTANA. 14 mamyr. QazAqparat - Baspana qurylysyna bólingen qarjyny ıgermeı otyrǵan óńirlerden qarajat ıgerýge qaýqarly aımaqtarǵa qaıta bólinedi.
Bul týraly búgin Úkimet otyrysynda Premer-Mınıstr Serik Ahmetov málim etti.
«Baspanaǵa degen suranys barlyq óńirde bar. Ásirese, qalalarda qansha adam kezekte turǵanyn jaqsy bilemiz, sonymen qatar baspanaǵa zárý qanshama adam bar. Ol úshin toǵyz baǵyt boıynsha baǵdarlama ázirlenip, onyń atyna zaty saı boýy úshin «Qoljetimdi baspana» dep ataldy. Osy baǵdarlamada qarastyrylǵan tetikterden bólek, óńir basshylarymen bul baǵdarlamany qosymsha qarjylandyrýdyń tetikteri paıda bolady dep kelisken edik. Búgingi talqylaý birqatar óńirlerde baǵdarlamanyń osy baǵyttaryndaǵy ákimshilerimen ózara is-qımylda problemalar bar ekendigin taǵy kórsetip otyr»,-dep toqtaldy Úkimet basshysy.
Onyń sózine qaraǵanda, bul turǵydaǵy máseleler qajetti qujattardy usyný, bazany daıarlaýǵa, jer telimin bólýge qatysty. Bunyń barlyǵy óńir basshylaryna júktelgen is bolyp tabylady.
«Kóbi jergilikti atqarý bılige baılanysty. ıAǵnı, bul baǵdarlamany júzege asyrýǵa olardyń qanshalyqty daıar bolýyna jáne nıetine qatysty. Atap aıtqanda, birinshi kezekte oblystar men Almaty, Astana ákimderiniń nazaryn baǵdarlamanyń 2013 jylda jáne odan keıingi jyldarda sózsiz oryndalýyna aýdaramyn»,-dep tapsyrdy S. Ahmetov.
Premer-Mınıstr birinshi jartyjyldyqtyń nátıjesi boıynsha QR Óńirlik damý mınıstrligine qurylys máselelerine baılanysty tıisti aqparatty daıarlaýdy júktedi. «Qarjy ıgerilmeı otyrǵan óńirlerden ıgerýge qaýqarly aımaqtarǵa qaıta bólinedi. Al ákimder qajetti baspananyń paıdalanýǵa berilýin qamtamasyz etpegeni úshin halyq aldynda jaýap beredi»,-dep qadaı aıtty Úkimet basshysy.
