S.Ahmetov 1 qyrkúıekke deıin buqaralyq sportty damytý baǵdarlamasyn Úkimet qaraýyna engizýdi tapsyrdy
ASTANA. 9 shilde. QazAqparat - Búgin Úkimettiń selektorlyq rejimdegi otyrysynda QR Premer-Mınıstri Serik Ahmetov Sport jáne dene shynyqtyrý isteri agenttigine1 qyrkúıekke deıin respýblıkada buqaralyq sportty damytý baǵdarlamasyn Mınıstrler kabınetiniń qaraýyna engizýdi tapsyrdy.
«Jumysty qoǵamdyq densaýlyqty damytýǵa, salaýatty ómir saltynyń qundylyqtary men mańyzdylyǵyna tárbıeleýge shoǵyrlandyrý qajet. Oǵan barlyq memlekettik organdar, UEU, BAQ jáne jumys berýshiler belsendi qatysýy tıisti. Memleket basshysynyń basa aıtýynsha,buqaralyq sport jáne joǵary jetistikter sporty keshendi júıeli ádisterdi talap etedi. Bul faktor Úkimet jumysynda eskerilýi kerek», - dedi Úkimet basshysy.
Osy rette S.Ahmetov Sport jáne dene shynyqtyrý isteri agenttigine múddeli organdarmen birlesip, belgilengen merzimde jańa redaktsııadaǵy «Dene tárbıesi jáne sport týraly» Zań jobasyn ázirleýdi tapsyrdy. Sonymen qatar agenttikke Ekonomıka jáne bıýdjettik josparlaý mınıstrligimen birlesip, respýblıkada buqaralyq sportty damytý baǵdarlamasyn ázirleý máselelerin qarastyrýdy ári ony osy jyldyń 1 qyrkúıegine deıin Úkimet qaraýyna engizýdi júktedi.
