S. Abdrahmanov: BAQ-tyń saılaý qarsańynda etıkaǵa qatysty Hartııa qabyldaýy - durys bastama
ASTANA. QazAqparat - BAQ-tyń saılaý qarsańynda etıkalyq normalardy saqtaýǵa qatysty Hartııa qabyldaýy - durys bastama. «Egemen Qazaqstan gazeti» AQ prezıdenti Saýytbek Abdrahmanov osyndaı pikir bildirdi.
Búgin Astanada birqatar BAQ basshylary 2016 jyldyń 20 naýryzynda ótetin QR Parlamenti Májilisiniń jáne máslıhat depýtattarynyń saılaý naýqanyn aqparattandyrý barysynda etıkalyq normalardy saqtaý týraly Hartııaǵa qol qoıǵan bolatyn.
«Parlament saılaýynyń mán-mańyzy qaı qoǵam, qaı zaman úshin de erekshe ról atqaratyny túsinikti. Bul erekshe mańyzdy saıası naýqan. Endeshe, elimizdegi basty saıası naýqannyń qarsańynda «Bas redaktorlar klýby» qalyptasqan dástúr boıynsha Hartııa daıyndaǵany quptarlyq. Bul, qaı jaǵynan alǵanda, durys bastama», - dedi S. Abdrahmanov.
Onyń aıtýynsha, Hartııa jańadan týyndaǵan dúnıe emes, onyń negizgi ıdeıasy burynnan bar. Elimizdegi birneshe saılaýlarda, saıası naýqan barysynda tynysh, qalypty jaǵdaı ornyǵýyna, saılaýdyń ádil, obektıvti, alalaýsyz ótýine buqaralyq aqparat quraldary óz úlesin qosyp kele jatyr.
«Bıylǵy saılaý da osy qalyppen júretinine senemiz. Sondyqtan da, Hartııany tolyq qoldaımyz», - dedi S. Abdrahmanov.
