Rysqalıev basqarǵan qylmystyq qaýymdastyq memleketke 71 mlrd. teńge zalal keltirdi - Qarjy polıtsııasy
ASTANA. 24 sáýir. QazAqparat - Rysqalıev basqarǵan qylmystyq qaýymdastyqtyń áreketi nátıjesinde memleketke jáne ózge tulǵalarǵa asa iri mólsherde jalpy somasy 71 mlrd. teńgeni quraıtyn zalal keltirildi.
Bul týraly búgin Qarjy polıtsııasynda ótken baspasóz máslıhatynda vedomstvonyń resmı ókili Murat Jumanbaı málimdedi.
Onyń aıtýynsha, tergeý barysynda qabyldanǵan sharalar nátıjesinde 23,4 mlrd. teńgeniń múlki memleketke qaıtaryldy.
«Odan ári memlketke keltirilgen zalaldy óteý maqsatynda aıyptalýshylardyń jalpy quny 39 mlrd. teńgeni quraıtyn 560 jyljymaıtyn jáne jyljıtyn múlik túrine tyıym salyndy, olardyń ishinde 4 aıaqtalmaǵan qurylys nysandary, 68 jer ýchaskesi, 116 birinshi jáne ekinshi satydaǵy nysandar (ákimshilik ǵımarattar, turǵyn úıler, keńseler, páterler men basqa obektiler), 197 kólik quraldary, kommertsııalyq uıymdardyń jarǵylyq kapıtaldaryndaǵy 19 úles, 145 óndiris qural-jabdyqtary, jalpy somasy 1 mlrd.100 mln. teńgeniń 11 bank shottary tárkilendi.
