Ryanair ushaǵynda ıllıýmınator synyp, jolaýshy syrtqa ushyp kete jazdady
ASTANA. KAZINFORM — Grekııadan Germanııaǵa baǵyt alǵan Ryanair áýe kompanııasynyń ushaǵynda ushý kezinde ıllıýmınator synyp, tereze janynda otyrǵan jolaýshyny syrtqa qaraı tartyp ákete jazdady, dep habarlaıdy DW.
Bul týraly 10 shilde, juma kúni oqıǵa kýágerleri Grekııanyń Radio Thessaloniki radıostantsııasyna jáne Germanııanyń dpa agenttigine habarlaǵan.
Olardyń aıtýynsha, 61 jastaǵy Serbııa azamatynyń basy men ıyǵy synǵan ıllıýmınator arqyly ushaqtyń syrtyna shyǵyp ketken. Ony salonda ustap qalý úshin birneshe jolaýshy bar kúshin salǵan.
Salonıkıden Germanııanyń ońtústigindegi Memmıngen qalasyna baǵyt alǵan ushaqta ottegi maskalary avtomatty túrde túsip qalǵan. Osydan keıin ushqysh reısti toqtatyp, ushaqty keri Salonıkı áýejaıyna qondyrǵan.
Zardap shekken jolaýshy jedel járdemmen Salonıkı qalasyndaǵy aýrýhanaǵa jetkizildi. Ol aýyr jaraqat alǵan joq. Al qalǵan jolaýshylar Germanııaǵa rezervtik ushaqpen jetkizildi.
Buǵan deıin Italııa Ryanair kompanııasyna 1 mlrd eýroǵa deıin aıyppul salýy múmkin ekenin jazdyq.
