Rýzaevka aýylyndaǵy qıraǵan úıler oblystyq bıýdjet esebinen qalpyna keltiriledi - SQO
PETROPAVL. QazAqparat - SQO ákimi Qumar Aqsaqalov kóshpeli brıfıngte óńirdegi sý tasqyny jaǵdaıy týraly aıtyp berdi, dep habarlaıdy «QazAqparat» HAA tilshisi.
Demalys kúnderi qyzyl sý Qyzyljar aýdany men Petropavl qalasyna jetti.
Bir táýlikte oblys ortalyǵy aýmaǵynda Esil ózeni 40 santımetrge deıin kóterildi. Sý tasqynynan ózenniń tómengi alqabynda ornalasqan Zarechnyı kenti zardap shegýde. Ol jaqtan 188 adam men 147 bas mal aldyn ala evakýatsııalandy. Ázirge úılerdi sý basqan joq, degenmen jergilikti bılik kez kelgen oqıǵaǵa daıyn otyr. Sý jaıylǵan jerlerden halyqty arnaıy kólikpen ótkizýde. Petropavl qalasynyń ákimi Marat Tasmaǵanbetovtiń aıtýynsha, jaǵdaı baqylaýda.
Óńir basshysy Qumar Aqsaqalov ótken táýlikte Sergeevka sý qoımasynda sý deńgeıiniń 190 sm deıin tómendegenin habarlady. Shal aqyn jáne Esil aýdandaryna esh qaýip tónip turǵan joq.
«Shtab kúndelikti jumys istep tur. Bárin baqylaýda ustap otyrmyz. Jaǵdaıdyń nasharlaýyn boldyrmaý maqsatynda Zarechnyı kentiniń turǵyndaryna kóshý kerek. Eger qutqarýshylar aıtsa, demek bul sharalardy jasaý qajet. Mol sý kele jatyr. Qyzyl sý áli de kelýi múmkin», - dedi oblys ákimi.
Ol evakýtsııalyq pýnktterge barǵanyn atap ótti. Onda zarechnyılyqtardyń qansha ýaqyt turatyny belgisiz. Keshe jańbyr jaýyp, kún sýytty. Sý tasqyny báseńsidi.
«Teri zaýytynda eski bóget nyǵaıtyldy, ótken jyly jańasy turǵyzyldy. Aldyńǵy kúni sýdyń eski bógetke jaqyndaǵany týraly eskertý kelip tústi. Túnde bastalǵan bógetti nyǵaıtý jumystary áli de jalǵasýda. Ony taǵy 50 sm kóteredi. Teri zaýytynda sý basqan úı joq», - dedi Qumar Aqsaqalov.
Sondaı-aq, óńir basshysy Rýzaevka aýylynda senbilikke 400-ge jýyq qoǵamdyq uıym ókilderi, jastar jáne soltústikqazaqstandyqtar shyqqanyn habarlady. Ondaǵy 12 qıraǵan úı oblystyq bıýdjet jáne esepshottarǵa kelip túsken qarajat esebinen qalpyna keltiriledi.
