Rústem Júginisov «Jańa tolqyn-2017» baıqaýynda qandaı án oryndaıdy
ASTANA. QazAqparat - «Jańa tolqyn-2017» halyqaralyq baıqaýyna Qazaqstannyń atynan qatysatyn Rústem Júginisovtyń shyrqaıtyn ánderi belgili boldy, dep habarlaıdy QazAqparat tilshisi.
Eske sala ketsek, «Jańa tolqynnyń» qazaqstandyq oryndaýshylar arasyndaǵy irikteý kezeńi naýryz aıynda ótken edi. Sáýir aıynda «H-faktor» shoýy arqyly elge tanylǵan Rústem dástúrge aınalǵan án baıqaýynda Qazaqstannyń atynan óner kórsetetinin málimdedi.
«Іrikteý kezeńinen keıin daıyndyqqa belsene kirisip kettim. Repertýaryma otyzdan astam túrli ánderdi tańdap, Máskeýge jiberdim. Olar baıqaý kúnderi oryndaıtyn úsh ándi bekitýi tıis. Osylaısha, baıqaýdyń alǵashqy kúni álemdik hıt kezeńinde Duran Duran tobynyń «Notorious» ánin oryndaımyn. Ekinshi kezeńde óz elimniń hıt ánin kórsetýim tıis, uıymdastyrýshylar qazaqstandyq NY-ZA tobynyń «Súıem seni» ánin tańdapty. Bul meniń tabıǵatymdy ashatyn, yrǵaqty ári kúrdeli án. Úshinshi kúni ózimniń avtorlyq «Máńgilik el» ánimdi aǵylshyn tilinde oryndaımyn, án mátinin aǵylshyn tiline aýdarǵanda taqyrybyn «Freedom» (Azattyq) dep ózgertýdi uıǵardyq», - dep jaýap berdi Rústem Júginisov QazAqparat tilshisiniń suraǵyna.
Aıta keteıik, «Jańa tolqyn» halyqaralyq án baıqaýy bıyl 8-15 qyrkúıek aralyǵynda Reseıdiń Sochı qalasynda ótedi. Onda 9 memleketten kelgen 14 ónerpaz synǵa túsedi.
Úsh jyl buryn balalar arasynda ótkizilgen «Jańa tolqyn-2014» halyqaralyq mýzykalyq baıqaýynda Rústemniń inisi Muhammedáli Júginisov úshinshi oryn alǵan edi.
