Rústem Qabanbaev IKAO aýdıtory mártebesin alǵan Ortalyq Azııadaǵy alǵashqy maman atandy
ASTANA. KAZINFORM – Qazaqstannyń avıatsııalyq ákimshiliginiń bas avıatsııalyq ınspektory Rústem Qabanbaev Rýmynııanyń Býharest qalasynda IKAO-nyń USAP-CMA baǵdarlamasy boıynsha aýdıtor retinde sertıfıkat aldy, dep habarlady QR Kólik mınıstrliginiń baspasóz qyzmeti.
Bul – Qazaqstannyń avıatsııalyq qaýipsizdik salasyndaǵy ataýly oqıǵa. IKAO-nyń avıatsııalyq qaýipsizdik aýdıtorlaryn daıarlaý kýrsy aıasynda R. Qabanbaev óz kásibı biliktiligin joǵary deńgeıde kórsetip, halyqaralyq avıatsııalyq qaýipsizdik monıtorıngi júıesinde Qazaqstandy tanytýǵa daıyn ekenin kórsetti.
Kazaqstandyq maman EUR/NAT óńirindegi elderdiń avıatsııalyq bılik organdarynyń ókilderi arasynan qatań irikteýden ótip, IKAO aýdıtory mártebesin alǵan Ortalyq Azııadaǵy jalǵyz maman boldy.
– Bul jetistik – Qazaqstannyń halyqaralyq arenadaǵy pozıtsııasyn nyǵaıtýda mańyzdy qadam bolyp otyr. Ol eldegi azamattyq avıatsııa modelin reformalaý, sondaı-aq keıingi 6 jylda qyzmeti júıeli túrde jetildirilip kele jatqan Qazaqstannyń avıatsııalyq ákimshiligin qurý, avıatsııalyq ınspektorlardyń kásibı ósýi men oqýy úshin jaǵdaı jasaýǵa múmkindik berilgeniniń nátıjesinde múmkin boldy.
Sertıfıkattalǵan aýdıtordyń bolýy elge IKAO-nyń jahandyq monıtorıng baǵdarlamasyn iske asyrýǵa belsene qatysýǵa, ulttyq avıatsııalyq qaýipsizdik júıesin jetildirýge jáne halyqaralyq standarttardy damytýǵa úles qosýǵa múmkindik beredi, - delingen habarlamada.
Atalǵan jetistik el basshylyǵynyń Qazaqstannyń halyqaralyq uıymdardaǵy rólin arttyrýǵa baǵyttalǵan strategııalyq baǵytyna tolyq saı keledi jáne jahandyq avıatsııalyq qaýymdastyqtyń joǵary senimin rastaıdy.
Eske sala keteıik, buǵan deıin Qazaqstannan álemniń 31 eline tikeleı ushýǵa bolatynyn jazǵan edik.