Rýstam Sybaı kásipqoı bokstaǵy alǵashqy kezdesýinde jeńiske jetti
ASTANA. QazAqparat - Qazaqstandyq boksshy Rýstam Sybaı kásipqoı bokstaǵy alǵashqy kezdesýinde jeńiske jetti, dep jazady massaget.kz.
Syr óńiriniń týmasy Ekaterınbýrgte ótip jatqan boks keshinde reseılik boksshy Vasılıı Podnebesnyıdy jeńdi. Birinshi raýndta Vasılıı belsendi judyryqtasyp, dóp soqqylarymen kózge túsken edi.
Ekinshi raýndtan bastap Rýstam qarsylasynan qarymdy, tájirıbeli ekenin baıqata bildi. Birneshe ret serııaly soqqylary arqyly qarsylasyn keri shegindirip te aldy. Nátıjesinde tórt raýnd qorytyndysy boıynsha tóreshiler biraýyzdan qazaqstandyq boksshyny jeńimpaz retinde tanydy.
Rýstam Sybaı áýesqoı boksta 75 kelige deıingi salmaqta judyryqtasty. Qazaqstan chempıonatynyń eki dúrkin jeńimpazy. 2013 jylǵy Azııa chempıonatynyń kúmis júldegeri.
Ekaterınbýrgtegi "Extra Round 4" boks keshine Rýstamnan ózge de qazaqstandyq boksshylar qatysýda. Keshtegi birinshi jekpe-jekte Ábilhaıyr Sheǵalıev Igor Erhovty birinshi raýndta nokaýtpen jeńdi. Al pavlodarlyq Aıbek Qojahmetov reseılik Samvel Gandılıanǵa tehnıkalyq nokaýtpen ese jiberdi.
Ekaterınbýrgte Dáýlet Dáýkenov kásipqoı bokstaǵy úshinshi jekpe-jegin ótkizip, Mıhaıl Lesnıkovty aıqyn jeńdi. Tóreshiler upaıy biraýyzdan Dáýletke berildi. Otandasymyz osyǵan deıingi eki kezdesýinde de jeńiske jetken.
