Rýslan Jıenbaev: Polıtsııaǵa keregi – adamgershilik, tózim, saýattylyq
KÓKShETAÝ. QazAqparat – Azamattarymyzdyń qaýipsizdigi men tynyshtyǵyn qamtamasyz etý. Bul - Zerendi aýdandyq polıtsııa basqarmasynyń ýaqytsha ustaý ızolıatorynyń kúzet-polıtseıi, polıtsııa starshınasy Rýslan Jıenbaevtyń ómirlik ustanymy, dep habarlaıdy QazAqparat.
Ol eńbekke degen qulshynysy men tabandylyǵynyń arqasynda quqyq qorǵaý organdary salasynda bıik belesterge jetti.
Óz qyzmetine adal jannyń jetken jetistigi men alǵan asýy ózimen ıyq tirestirip júrgen áriptes ini-qaryndastaryna úlgi bolardaı. 15 jyldan astam bir salada tapjylmastan istegen eńbeginiń arqasynda ol quqyq qorǵaý organdary salasynda mol tájirıbe jınaqtaǵan. Sol sebepti, ujymda da syıly. Iyq tirestirip birge qyzmet istep júrgen áriptesteri men qurbylary Rýslan Jınebaevty bilikti maman ári óz isine adal qyzmetker sanaıdy.
Zerendi aýdanynyń Kókterek aýylynda dúnıege kelgen ol bala kezinen polıtsııa bolýdy armandaǵan. 2005 jyly áskerı boryshyn ótep kelgen soń quqyq qorǵaý organdaryna qyzmetke qabyldanypty.
«Bul qyzmetke eń basty keregi – adamgershilik, tózim, saýattylyq. Sondaı-aq bul qyzmet aadamdy shydamdylyqqa úıretedi. Jaýapty jumys bolǵandyqtan, basshylardyń bergen tapsyrmalaryn múltiksiz oryndaýǵa tyrysamyn. Men úshin bul úlken jaýapkershilik», - deıdi Rýslan Jıenbaev.
Búginde Rýslan pandemııa kezinde óńirde koronavırýs ınfektsııasymen kúreske óz úlesin qosyp júr. Elimiz boıynsha jarııalanǵan tótenshe jaǵdaı kezinde «Zerendi-Kókterek» avtojolynyń №3 blokpostynda kúsheıtilgen rejımde kezekshilik atqardy. Kenjesi osy tótenshe jaǵdaı kezinde dúnıege kelipti.
«Sondaı bir kezekshilik kezinde maǵan tanysym qońyraý shalyp, qosaǵym Áseldiń ul balany dúnıege ákelgenin aıtty. Bul habarǵa qatty qýandym, biraq, kúsheıtilgen rejımde jumys istep júrgendikten áıelim men ulymdy kórýge bara almadym», – deıdi Rýslan.
Bul erli-zaıyptynyń 10 jáne 13 jastaǵy qyzdarynan keıingi kópten kútken uly. Mamyrdyń 5-de týǵan ulynyń esimin alańsyz ómir súrsin dep Alan qoıǵan. Aǵa býynnyń tájirıbesine júginip, olardyń aqyl-keńesterine qulaq asatyn Rýslan Jıenbaev qyzmetine ǵana adal emes, shańyraǵyn bıik, keregesin myqty ustap otyrǵan otaǵasy. Qudaı qosqan qosaǵy Ásel ekeýi osy kúni qyzy eki qyz, bir uldy tárbıelep otyr.
