Rýslan Jeldibaı Prezıdenttiń Ázerbaıjanǵa jasaǵan resmı saparyna qatysty pikir bildirdi
«Búgin Memleket basshysynyń Ázerbaıjan Respýblıkasyna resmı sapary sátti ótti dep tolyq senimmen aıtýǵa bolady. Eki jaqty kelissózder nátıjesinde 10 qujatqa qol qoıyldy.
Eń aldymen, ótken jyldyń qorytyndysy boıynsha ózara saýda aınalymy 3 esege artqanyn atap ótken jón. Bıyl da saýda-sattyq salasynda osy deńgeıdegi ósim bar. Dese de bul baǵytta biraz jumys atqarylýy tıis.
Qazaqstan men Ázerbaıjan Eýrazııanyń negizgi tranzıtik dálizi sanalady. Sondyqtan kólik-tranzıt, logıstıka salasynda biraz kelisimge qol jetkizildi. Transkaspıı halyqaralyq kólik baǵytynyń áleýetin arttyrý úshin ortaq keshendi sharalar qabyldanatyn boldy. Teńiz porttarymyz arasyndaǵy kooperatsııany tereńdetý máselesi de talqylandy.
Elimiz baýyrlas memleketke aýyl sharýashylyq ónimderi eksportyn arttyra alady. Qazaqstandyq óndirýshi kompanııalar Ázerbaıjanǵa jalpy somasy 300 mıllıon dollardan asatyn 100 túrli taýar kólemin ulǵaıtýǵa daıyn.
Ázerbaıjan tarapy Sýmgaıt qalasyndaǵy kóshelerdiń birine ult ustazy, aǵartýshy Ahmet Baıtursynulynyń esimin berdi», - dedi Rýslan Jeldibaı jelidegi paraqshasynda.
Onyń aıtýynsha, Ázerbaıjan BUU Qaýipsizdik Keńesiniń Jarǵysy men qararlaryna sáıkes, terrıtorııalyq tutastyǵyn qalpyna keltirgen.
«Osy baǵytta qazaq-ázerbaıjan qarym-qatynasyn jańa deńgeıge shyǵarý úshin Prezıdent Fızýlı qalasynda balalarǵa arnalǵan Qurmanǵazy atyndaǵy shyǵarmashylyqty damytý ortalyǵyn salý týraly sheshim qabyldady. Bul – qazaq halqynyń atynan syılyq.
Joǵaryda atalǵan kelisimderdiń negizinde Qazaqstan men Ázerbaıjan arasynda Strategııalyq qatynastardy nyǵaıtý jáne odaqtastyq yntymaqtastyqty tereńdetý týraly deklaratsııaǵa qol qoıyldy. Bul - baýyrlas eki el arasyndaǵy baılanysty bekem etetin irgeli qujat», - dep tolyqtyrdy baspasóz hatshysy.
Aıta keıteıik, Qazaqstan Prezıdenti Qasym-Jomart Toqaev pen Ázerbaıjan Prezıdenti Ilham Álıev keńeıtilgen quramda kelissóz júrgizdi.
Qasym-Jomart Toqaev Ázerbaıjanǵa ekijaqty yntymaqtastyqty jańa deńgeıge shyǵarý úshin arnaıy mıssııamen kelgenin aıtty. Qazaqstan Prezıdenti ekijaqty saýda-ekonomıkalyq baılanystardy damytý máselelerine egjeı-tegjeıli toqtaldy.
«Keıingi jyldary taýar aınalymynyń aıtarlyqtaı, úsh esege jýyq óskenine qýanyshtymyn. Biraq bul, árıne, jaıbaraqat júrýge negiz emes ekenin atap ótkim keledi. Saýdany arttyrýǵa múmkindikter bar dep esepteımin. Bizdiń úkimetterimiz jaqyn arada elderimiz arasyndaǵy taýar aınalymyn 1 mıllıard dollarǵa deıin ulǵaıtý úshin jumys isteýi kerek», – dedi Memleket basshysy.
Foto: akorda.kz
