Rýslan Jeldibaı qosymsha qoǵamdyq qyzmetke taǵaıyndaldy
ASTANA. KAZINFORM — Qazaqstan Prezıdentiniń keńesshisi — baspasóz hatshysy Rýslan Jeldibaı Halyqaralyq dzıýdo federatsııasynyń (IJF) jańa tehnologııalar jáne tıimdilikti arttyrý boıynsha komıssııasynyń dırektory qyzmetin atqarady.
Bul týraly Rýslan Jeldibaı óziniń áleýmettik jelidegi paraqshasynda málim etti.
— Halyqaralyq dzıýdo federatsııasynyń (IJF) jańa tehnologııalar jáne tıimdilikti arttyrý boıynsha komıssııasynyń dırektory qyzmetine taǵaıyndaldym. Bul — qosymsha qoǵamdyq qyzmet. Senim bildirgen IJF basshylyǵyna, Marıýs Vızer myrzaǵa alǵys bildiremin, — dep jazdy ol.
Qazaqstan Prezıdentiniń baspasóz hatshysynyń sózinshe, elimizdiń halyqaralyq sport uıymdarynda ókilderiniń bolýy — óte mańyzdy.
— Bul qadam arqyly elimizdiń bedelin nyǵaıtýmen qatar, tájirıbe de almasamyz. Dzıýdony elimizde damytý baǵytynda biraz jumys atqarylyp jatyr. Áli de másele jeterlik. Dzıýdony keńinen damytý úshin arnaıy akademııa, al aımaqtarda ortalyqtar qajet bolyp tur. Halyqaralyq yntymaqtastyqty da arttyramyz. Osy iske barynsha óz úlesimdi qosamyn, — dep túıindedi ol.
Buǵan deıin 17 aqpanda Memleket basshysynyń Jarlyǵymen Rýslan Jeldibaı Qazaqstan Respýblıkasy Prezıdentiniń ishki saıasat máseleleri jáne kommýnıkatsııalar jónindegi kómekshisi laýazymynan bosatylyp, Qazaqstan Respýblıkasy Prezıdentiniń keńesshisi – Prezıdenttiń Baspasóz hatshysy laýazymyna taǵaıyndaldy.