Rýslan Jeldibaı sońǵy kadrlyq aýys-túıiske qatysty málimdeme jasady

ASTANA. KAZINFORM –  Qazaqstan Respýblıkasy Prezıdentiniń kómekshisi — Prezıdenttiń baspasóz hatshysy Rýslan Jeldibaı keıingi kadrlyq ózgeristerge baılanysty  túsinikteme berdi. 

— Keıingi kadrlyq ózgeristerge baılanysty BAQ ókilderinen kóptegen saýal kelip jatyr. Eń aldymen, myna máseleni basa aıtý kerek, bul — ádettegi kadrlyq rotatsııa. Negizgi maqsat — memlekettik júıedegi eń mańyzdy baǵyttardyń tıimdiligin kúsheıtý, — dedi ol.

Memleket basshysy jýyrdaǵy Joldaýynda ulttyq ekonomıkaǵa túsetin ınvestıtsııa kólemin arttyrýdy basym mindettiń biri retinde belgiledi.

— Bul mańyzdy sala tájirıbeli dıplomat Murat Nurtileýge júkteldi. Prezıdenttiń kómekshisi retinde ol halyqaralyq ınvestıtsııalyq jáne saýda yntymaqtastyǵyn ilgeriletý maqsatynda shet memleketterdiń joǵary deńgeıdegi ókilderimen, sondaı-aq álemdik iri kompanııalardyń jetekshilerimen baılanysty damytady.

Memleket basshysynyń Jarlyǵymen Jaslan Mádıev Premer-mınıstrdiń orynbasary — Jasandy ıntellekt jáne tsıfrlyq damý mınıstri bolyp taǵaıyndaldy. Vedomstvo basshysy Joldaýda aıtylǵan Qazaqstandy tsıfrlyq memleketke aınaldyrý jónindegi maqsatty iske asyrýmen shuǵyldanady. Prezıdent mınıstrge strategııalyq mańyzy zor jumysty atqarýǵa qatysty baǵyt-baǵdar berdi.

Sonymen qatar Premer-mınıstrdiń kelisimi boıynsha Májilis depýtaty Juldyz Súleımenovany Oqý-aǵartý mınıstri laýazymyna taǵaıyndaý týraly sheshim qabyldandy. Jańa mınıstr qoǵamdaǵy belsendi qyzmetimen jáne bilim berý salasyndaǵy mol tájirıbesimen belgili, — dedi Rýslan Jeldibaı. 

Aıta ketelik Juldyz Súleımenova Oqý-aǵartý mınıstri bolyp taǵaıyndalǵan edi.