Rýslan Jaqsylyqovty qamaýǵa aldy dep habarlaǵandardyń ústinen qylmystyq is qozǵaldy

ASTANA. KAZINFORM — Іshki ister mınıstrligi Kazinform saýalyna joldaǵan jaýapta Qorǵanys mınıstri bolǵan Rýslan Jaqsylyqovtyń qamaýǵa alyný týraly aqparatqa baılanysty málimet berdi.

— Suraýhatta kórsetilgen adamnyń qamaýǵa alynǵany týraly buqaralyq aqparat quraldarynda kórineý jalǵan aqparat taratý faktisi boıynsha Astana qalasynyń Polıtsııa departamenti Qylmystyq kodektiń 274-baby 2-bóligi boıynsha (buqaralyq aqparat quraldaryn nemese telekommýnıkatsııalar jelilerin paıdalana otyryp, kórineý jalǵan aqparat taratý) sotqa deıingi tergeý júrgizip jatyr, — dep jazylǵan resmı jaýapta.

Biraq mınıstrlik qylmystyq is naqty kimderdiń ústinen qozǵalǵanyn aıtýdan bas tartyp otyr. Al R. Jaqsylyqovtyń qamaýǵa alynǵanyn anonımdi telegram-arnalar taratyp, keıin ony keıbir aqparat portaldary kóshirip basqan bolatyn.

— QR Qylmystyq-protsestik kodeksiniń 201-babyna sáıkes sotqa deıingi tergep-tekserý derekteri jarııa etilmeýi tıis. Tergeý júrgizilip jatyr. Anyq-qanyǵy tergeý barysynda anyqtalady. Basqa málimet bere almaımyz, — dedi ishki ister mınıstrligindegiler.

Buǵan deıin Bas prokýrordyń orynbasary Áset Shyndalıev te burynǵy Qorǵanys mınıstri Rýslan Jaqsylyqovtyń qamaýǵa alynǵany jóninde taraǵan málimetke qatysty pikir bildirgen bolatyn.