Rýslan Myrsataev «Astana arlandarynan» ketti
ASTANA. QazAqparat - Bokstan asa aýyr salmaqta óner kórsetetin Rýslan Myrsataev «Astana arlandary» klýbynyń qatarynan ketti. Bul týraly «Alash aınasy» ınternet-portalynyń tilshisine Dúnıejúzilik boks serııasynda elordanyń namysyn qorǵaıtyn ujymnyń bas bapkeri Marat Jaqıev aıtty.
«Jaraqatyna baılanysty Rýslan komanda sapynan ketti. Endi densaýlyǵyn túzeý úshin em-dom qabyldaıdy. Eger, densaýlyǵy durystalatyn bolsa, komanda qataryna qaıta qosylýy múmkin. Myrsataev ketkennen soń ujym qatarynda aýyr salmaqta bir ǵana boksshy qaldy. Ol - Fılıpp Hrgovıch. Ázirshe horvat legıoneri ózine artylǵan senimdi aqtap júr. Barlyq kezdesýinde jeńiske jetti.
Biraq, onyń bir ózi maýsym sońyna deıin shydamaıtyny anyq. Sondyqtan da el ishinen aýyr salmaqta judyryqtasyp júrgen jigitterdi tartýdy qarastyryp jatyrmyz. «Arlandardyń» aldaǵy jekpe-jegine Ivan Dychkony shaqyramyz. Odan bólek, Nurjan Bekzatov pen Qamshybek Qońqabaev bar. Alaıda, bul boksshylardyń barlyǵyn komandaǵa shaqyrýǵa klýbtyń bıýdjeti jetpeıdi. Sol úshin ol jigitterdi bir-birden shaqyramyz», - deıdi Marat Jaqıev.
Aıta keteıik, asa aýyr salmaqta óner kórsetetin Rýslan Myrsatev Dúnıejúzilik boks serııasynda óner kórsetetin «Astana arlandary» klýbynyń birinshi maýsymynan bastap óner kórsetken edi. Boksshy klýbpen birge WSB jobasynda bir ret chempıon atanyp, kúmis jáne qola júldelerin de jeńip aldy. Odan bólek, Rýslan 2008 jyly Qytaıdyń bas shahary - Beıjińde ótken Olımpıada oıyndarynda Qazaqstan namysyn qorǵaǵan.
