Rýslan Dálenov: Jumyspen qamtýdyń jol kartasy boıynsha 1 trln teńge bólindi

NUR-SULTAN. QazAqparat – Ulttyq ekonomıka mınıstri Rýslan Dálenov Prezıdenttiń tapsyrmasy boıynsha Úkimet eldegi áleýmettik-ekonomıkalyq turaqtylyqty saqtaý boıynsha aýqymdy sharalardy belsendi túrde iske asyryp jatqanyn málim etti, dep habarlaıdy QazAqparat tilshisi.

«Birinshiden, Tótenshe jaǵdaı kezeńinde ekonomıkany turaqtandyrý jáne halyqty qoldaý boıynsha jedel sharalardyń 2 paketi qabyldandy. Sharalar jumyspen qamtamasyz etýge, halyqtyń tabysyn tómendetpeýge, turǵyn-úı qurylysyna, bıýdjettiń salyq kiristerin qalpyna keltirýge jáne basqa da salalarǵa baǵyttalǵan. Memlekettiń barlyq áleýmettik mindettemeleri ýaqtyly tólenýde. Sonymen qatar eńbek naryǵyndaǵy turaqtylyqty qamtamasyz etý úshin «Jumyspen qamtý jol kartasy» jańa baǵdarlamasy boıynsha 1 trln teńge bólindi. Osy baǵdarlamany iske asyrý óńirlerde halyqtyń ómir súrý sapasyn jaqsartýǵa baǵyttalǵan kóptegen mańyzdy máselelerdi sheshýge múmkindik beredi. Bul – apatty jáne úsh aýysymdy mektepter sanyn azaıtý, gazdandyrý, sapaly jergilikti joldar salý, ınjenerlik-kommýnıkatsııalyq ınfraqurylymdy jańǵyrtý, sondaı-aq taza aýyz sýmen qamtamasyz etý baǵytyndaǵy sharýalar», - dedi Rýslan Dálenov OKQ-da ótip jatqan baspasóz máslıhatynda.

Mysaly Jambyl oblysynda gazdandyrý jobasyn júzege asyrý nátıjesinde Qordaı aýdany aýyldarynyń 50 myńnan astam turǵyny tabıǵı gazǵa qol jetkizedi. Sol sekildi Atyraý oblysy Qurmanǵazy aýdanynda halyqty aýyz sýmen qamtamasyz etý úshin magıstraldyq sý jelesiniń qurylysy júrgizilip jatyr. Osyndaı jobalar elimizdiń ár óńirinde halyqtyń ómir súrý jaǵdaıyn jaqsartý boıynsha ózekti mindetterdi sheshpek.