Rýslan Dálenov úsh jyldyq jalpy sıpattaǵy transfertterdiń erekshelikterin atady
NUR-SULTAN. QazAqparat - Búgin QR Parlamenti Senatynyń jalpy otyrysynda «Respýblıkalyq jáne oblystyq bıýdjetter, respýblıkalyq mańyzy bar qalalar, astana bıýdjetteri arasyndaǵy 2020-2022 jyldarǵa arnalǵan jalpy sıpattaǵy transfertterdiń kólemi týraly» zań jobasy qabyldandy, dep habarlaıdy QazAqparat tilshisi.
«Zań jobasy aǵymdaǵy jyly 2017-2019 jyldarǵa arnalǵan transfertter týraly zańnyń qoldanysy aıaqtalýyna baılanysty ázirlendi. Jalpy sıpattaǵy transfertter óńirlerdiń bıýdjettik qamtamasyz etilýin teńestirýge baǵyttalǵan. Transfertterdiń kólemi ádistemege sáıkes esepteldi. 2020-2022 jyldarǵa arnalǵan jalpy sıpattaǵy transfertterdiń mynadaı erekshelikteri bar. Birinshi - jergilikti atqarýshy organdardy shaǵyn jáne orta bıznesti damytýǵa yntalandyrý. Ol úshin shaǵyn jáne orta bıznesten túsetin korporatıvtik tabys salyǵyn 2020 jyldan bastap jergilikti bıýdjetterge berý qarastyryldy», - dedi zań jobasyn tanystyrǵan QR Ulttyq ekonomıka mınıstri Rýslan Dálenov.
Onyń aıtýynsha, ekinshisi - óńirlerdiń erekshelikterin eskerý. Ol úshin jańa koeffıtsıentter engizildi. Bul - mektepter shaǵyn jınaqtylyǵy, aýyl sharýashylyǵynyń áleýetti ónimderiniń kólemi, aýmaq aýdany, turǵyn úı sany, óńirdiń jalpy óńirlik óniminde shaǵyn jáne orta bıznestiń úlesi.
«Úshinshi - jergilikti kiristerdiń ósý áleýeti. Damý bıýdjetine eki jańa komponent engizildi. Jergilikti bıýdjetterdiń kiristeri ósken jaǵdaıda, damý bıýdjeti ulǵaıady. Úshjyldyq kezeńde jalpy óńirlik ónimniń ósýi jyldamdaǵan jaǵdaıda sýbventsııaly óńirler qosymsha koeffıtsıentter alady. Buryn nysanaly transferttermen qarjylandyrylǵan shyǵystar jalpy sıpattaǵy transfertterge berildi. Bul 2020 jyly 624 mlrd teńge, 2021 jyly – 651 mlrd teńge, 2022 jyly – 664 mlrd teńge», - dedi ol.
Mınıstrdiń dereginshe, jergilikti bıýdjetterdiń jalpy shyǵystarynyń kólemi 2020 jyly – 4,7 trln teńge, 2021 jyly – 4,9 trln teńge, 2022 jyly – 5,1 trln teńge kóleminde aıqyndaldy. Zań jobasynda agroónerkásiptik keshendi sýbsıdııalaýǵa, medıtsınalyq mekemelerdiń kúrdeli shyǵyndaryna jáne mektepterdi salýǵa jergilikti atqarýshy organdarmen baǵyttalýy tıis bıýdjet qarajatynyń eń tómen kólemi bekitiledi.
«Osyny eskere otyryp jalpy sıpattaǵy transfertter mynadaı kólemde aıqyndaldy: bıýdjettik alyp qoıýlar: 2020 jyly – 420 mlrd teńge; 2021 jyly – 451 mlrd teńge; 2022 jyly – 490 mlrd teńge. Bıýdjettik sýbventsııalar: 2020 jyly – 2 trln 104 mlrd teńge; 2021 jyly – 2 trln 121 mlrd teńge; 2022 jyly – 2 trln 125 mlrd teńge. Osylaısha, 2020-2022 jyldary 13 sýbventsııalyq jáne tórt donor óńir anyqtaldy», - dedi R.Dálenov.
