Rýslan Dálenov shaǵyn jáne orta bıznestiń úlesi tómen óńirlerdi atady

NUR-SULTAN. QazAqparat - Elimizdiń birqatar oblysynda shaǵyn jáne orta bıznestiń ekonomıkadaǵy úlesiniń tómendeýi baıqalady. Bul týraly búgin Úkimet otyrysynda atalǵan baǵdarlamanyń iske asyrylý barysy jaıynda baıandaǵan QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

"2017 jyldyń qorytyndysy boıynsha shaǵyn jáne orta bıznestiń ónim shyǵarý kólemi 23 trln teńgeni qurady. Bul rette, ónim shyǵarý qurylymynyń besten bir bóligi ónerkásiptiń úlesine tıesili. 2018 jylǵy 9 aıdyń qorytyndysy boıynsha shaǵyn jáne orta bıznestiń jalpy óńirlik ónimdegi úlesi ártúrli ózgergen. Shaǵyn jáne orta bıznestiń kóp úlesi Nur-Sultan, Almaty qalalaryna jáne Shyǵys Qazaqstan oblysyna tıesili. Eń tómen bóligi - Qyzylorda, Pavlodar jáne Qaraǵandy oblystarynda. Bul rette, sońǵy 4 jylda birqatar óńirlerde shaǵyn jáne orta bıznestiń ekonomıkadaǵy úlesiniń tómendeýi baıqalady. Olar: Batys Qazaqstan jáne Pavlodar oblystary", - dedi mınıstr.

Onyń atap ótýinshe, 2017 jyly el boıynsha ónimniń zattaı kórinistegi shyǵarylymynyń ósimi 2015 jyldyń deńgeıimen salystyrǵanda 128 paıyz nemese 23,2 trln teńgeni qurady.

"Óńirler bólinisinde eń úlken ósim Atyraý oblysynda, Almaty qalasynda jáne Qostanaı oblysynda qamtamasyz etilgen. Eń tómen ósim - Aqtóbe, Pavlodar jáne Mańǵystaý oblystarynda baıqalǵan", - dedi R.Dálenov.