Rýslan Dálenov: MJÁ jobalarynyń biryńǵaı bazasy keńeıtiledi
ASTANA. QazAqparat - Qazaqstanda memlekettik-jekeshelik áriptestik jobalarynyń biryńǵaı bazasy keńeıtiletin bolady. Bul týraly búgin Senat depýtattarymen kezdesý barysynda QR Ulttyq ekonomıka birinshi vıtse-mınıstri Rýslan Dálenov aıtty, dep habarlaıdy QazAqparat tilshisi.
"Qazynashylyq tirkeý bolmasa, onda birde bir kelisimshartty bank almaıdy. Qazynashylyq tirkeý 2017 jyldan engizilgen. Barlyǵy 402 kelisimshart 1,1 trln teńge somaǵa tirkelgen. Aldaǵy ýaqytta da mundaı kelisimsharttar qazynashylyqta tirkeletin bolady", - dedi vıtse-mınıstr MJÁ jobalaryn júzege asyrýdaǵy ahýalǵa toqtala kele.
Sonymen qatar ol memlekettik-jekeshelik áriptestik jobalarynyń biryńǵaı bazasyn keńeıtý máselesine toqtaldy.
"MJÁ-men aınalysqysy keletin kóptegen bıznesmen, MJÁ uıymdastyrǵysy keletin memlekettik organdar olardyń qandaı joba ekendigin, úlgilerimen qaıdan tanysýǵa bolatyndyǵyn surap jatady. Sondyqtan biryńǵaı baza jasadyq. Onda barlyq jobalardyń ataýy, somasy, kelisimshart datasy kórsetilgen. Degenmen, qazir bıznesmender keńirek aqparattardy bilgileri keletindigin aıtyp jatyr. Qazir jergilikti atqarýshy organdarmen birge árbir nysan boıynsha jan-jaqty aqparattardy kórsetetin siltemeni ázirlep jatyrmyz. Investor siltemege ótý arqyly naqty jobany kóre alatyn bolady", - dedi Rýslan Dálenov.
