Rýslan Dálenov qandaı salalarǵa maman daıyndaý qajettigin atady
«Halyqaralyq sarapshylardyń derekterine sáıkes, álemde eńbek naryǵyna mynadaı trendter áser etetin bolady. Tsıfrlandyrý jáne aqparattyq-kommýnıkatsııalyq tehnologııalardyń damýy. Bul eńbek ónimdiliginiń ósýine yqpal etedi. Jalpy, tehnologııalardy damytý jumys oryndarynyń qysqarýyna áserin tıgizedi. Sonymen birge, óndiristerge qyzmet kórsetý salasynda jańa jumys oryndary qurylatyn bolady.
Jumys oryndarynyń kúrdelenýi. Biliktiligi joǵary jumys kúshine suranys ósýde. Biliktiligi tómen jumys oryndary qysqarýda. Bul ámbebap daǵdylardy damytýdyń qajettiligine alyp keledi», - dedi mınıstr.
Onyń aıtýynsha, kelesi trend jumyspen qamtýdyń ıkemdi nysandaryn engizý. Qazirgi ýaqytta jumyspen qamtýdyń frılans, kraýdvorkıng jáne basqa da qashyqtyqtan ári tolyq emes nysandarynyń artýy baıqalady. Halyqaralyq sarapshylardyń baǵalaýy boıynsha, 2020 jyldan bastap frılanserler álemdegi barlyq jumys kúshiniń eleýli bóligin quraıtyn bolady.
«Demografııalyq ózgerister. Bul orta jastyń uzarýy saldarynan eńbek etý jyldary uzaqtyǵynyń artýy. Jahandyq trendter Qazaqstan úshin de sáıkes keledi. Budan basqa, jergilikti eńbek naryǵyna mynalar áser etetin bolady. Bul - JІÓ-niń jańa sapaly ósýine jylyna 5 paıyz jáne odan joǵary deńgeıge kóshýi. Kóptegen ınvestıtsııalyq jobalardy iske asyrý ekonomıkanyń basym salalarynda sapaly jumys oryndaryna suranysty arttyrady.
Shaǵyn jáne orta bıznestiń rólin kúsheıtý. Onyń úlesi JІÓ-niń 35 paıyzyna deıin ósedi. Eńbek naryǵy ıkemdiliginiń artýy. Bul - eldegi jáne álemdegi makroekonomıkalyq jáne ózge de ózgeristerge ıkemdilik», - dedi Rýslan Dálenov.
Mınıstrdiń sózine qaraǵanda, búgingi tańda 41,6 trln teńgege ınvestıtsııalyq jobalar pýly quryldy. Osy pýlǵa súıene otyryp, jańa daıyndalǵan kadrlarǵa suranys 2025 jylǵa deıin 1,3 mln adam deńgeıinde baǵalanady.
Jumys oryndarynyń eń kóp sany týrızm, kólik, AÓK, saýda jáne AKT salalarynda josparlanýda. Bul bilikti kadrlardy kóptep daıyndaýdy talap etetin bolady«, - dedi ol.