Rýslan Dálenov eldiń áleýmettik-ekonomıkalyq damýyna qatysty túsinik berdi
NUR-SULTAN. QazAqparat - Eldiń 2019 jylǵa arnalǵan áleýmettik-ekonomıkalyq damý boljamy kórsetkishteri bıylǵy sáýirde túzetilgen boljam deńgeıine saqtalady. Bul týraly Parlament Májilisiniń jalpy otyrysynda Ulttyq ekonomıka mınıstri Rýslan Dálenov máim etti, dep habarlaıdy QazAqparat tilshisi.
«2019 jyly nomınaldy Jalpy ishki ónim 64,3 trln teńge kóleminde boljanady. Eksport 54,4 mlrd AQSh dollary, ımport 32,9 mlrd dollar kóleminde boljanady. 2019 jylǵa arnalǵan respýblıkalyq bıýdjettiń negizgi parametrleri aǵymdaǵy jyldyń sáýir aıynda naqtylanǵan kólemde saqtalǵan», - dedi mınıstr.
Vedomstvo basshysynyń aıtýynsha, 2019 jylǵa arnalǵan eldiń áleýmettik- ekonomıkalyq damý boljamynyń parametrleri burynǵy deńgeıinde saqtalǵan jáne ózgermeıdi. 2019 jylǵa munaıdyń boljamy baǵasyn bir barrel úshin 55 AQSh dollary deńgeıinde saqtaý usynylady. QR Ulttyq bankiniń boljamdary boıynsha jyldyq ınflıatsııanyń nysanaly dálizi 4-6 paıyz sheginde saqtalǵan. Aǵymdaǵy jyldyń basynan beri ekonomıkanyń damý serpini eskerile otyryp, 2019 jyly JІÓ-niń ósýi buryn bekitilgen 3,8 paıyz deńgeıinde bolmaq.
Bıýdjetti naqtylaý aıasynda Ulttyq qordan nysanaly transfertterdi qaıta bólý usynylady. 370 mlrd teńgeden 300 mlrd teńgeni áleýmettik sharalardy kúsheıtýge, tutynýshylyq nesıeler boıynsha halyqtyń boryshyn tómendetýge, sondaı-aq Úkimettiń rezervin ulǵaıtýǵa jiberý usynylady.
Aıta keteıik, jalpy otyrysta palata depýtattary «2019-2021 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýar engizý týraly» zań jobasyn talqylap jatyr.
Eske sala keteıik, Parlamenttiń tórtinshi sessııasy 2019 jylǵy 5 shildege deıin uzartyldy.
Atap aıtqanda, mańyzdy sharalardy iske asyrý úshin 2019-2021 jyldarǵa arnalǵan respýblıkalyq bıýdjet týraly zańǵa ózgeristerdi engizý qajet boldy. Osyǵan baılanysty bıýdjetke engiziletin ózgeristerdi qarastyrý úshin Parlament sessııasynyń jumys merzimi uzartyldy.
