Rýslan Dálenov ekonomıkalyq ósim qarqyny baıaýlaǵan óńirlerdi atady

NUR-SULTAN. QazAqparat – Elimizdiń birqatar óńirinde ósimniń teris kórsetkishi oryn alyp otyr. Bul týraly búgin Úkimet otyrysynda QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Negizgi kórsetkishter boıynsha ósimniń oń serpini kóptegen óńirlerde baıqalady. Sonymen birge, ónerkásip boıynsha Qyzylorda, Batys Qazaqstan jáne Mańǵystaý oblystary teris aımaqta qalýyn jalǵastyrýda. Atalǵan óńirlerde munaı jáne gazkondensatyn óndirý qysqarǵan. Aýyl sharýashylyǵy boıynsha Qostanaı oblysyn qospaǵanda barlyq óńirlerde ósý qamtamasyz etildi. Qostanaı oblysy dándi daqyldardy jınaýdyń tómendeýinen teris aımaqqa ótti. Eń joǵary ósýdi Aqmola oblysy kórsetip otyr», - dedi mınıstr.

Onyń dereginshe, qurylys boıynsha artta qalýshylardyń qatarynda 4 óńir bar. Bul burynǵydaı Shymkent, Mańǵystaý oblysy jáne Nur-Sultan qalasy. Budan basqa, turǵyn úıler qurylysynyń jáne ınjenerlik-kommýnıkatsııalyq ınfraqurylymnyń tómendeýi saldarynan Aqtóbe oblysy osy tizimge qosyldy.

«Negizgi kapıtalǵa salynǵan ınvestıtsııalardyń tómendeýi áli de Shymkent jáne Nur-Sultan qalalarynda, sondaı-aq Mańǵystaý oblysynda saqtalyp otyr. Birqatar óńirler birneshe kórsetkish boıynsha jaqsy serpin kórsetýde. Bul ónerkásip, óńdeý, ken óndirý, aýyl sharýashylyǵy, qurylys, turǵyn úılerdi paıdalanýǵa berý jáne ınvestıtsııalar. Túrkistan jáne Shyǵys Qazaqstan oblystarynda – 5 kórsetkish, Atyraý, Qyzylorda, Qaraǵandy jáne Soltústik Qazaqstan oblystarynda – 3 kórsetkish joǵary ósýdi kórsetýde. Mańǵystaý oblysy, Nur-Sultan jáne Shymkent qalalary boıynsha birneshe kórsetkish boıynsha tómendeý baıqalady», - dedi Rýslan Dálenov.

Mınıstrdiń atap aıtýynsha, Mańǵystaý oblysynda qurylys, ınvestıtsııalar, turǵyn úılerdi paıdalanýǵa berý, ónerkásip, Nur-Sultan qalasynda turǵyn úılerdi paıdalanýǵa berý, ınvestıtsııalar, qurylys, Shymkent qalasynda ınvestıtsııalar, ken óndirý ónerkásibi jáne qurylys kórsetkishteri tómendegen.