Rýslan Dálenov Doing Business reıtıngi aıasynda elimizdiń pozıtsııasy týraly túsindirdi

NUR-SULTAN. QazAqparat – Ulttyq ekonomıka mınıstri Rýslan Dálenov Doing Business reıtıngi aıasynda elimizdiń pozıtsııasyn jaqsartý josparlarymen bólisti, dep habarlaıdy QazAqparat tilshisi.

«Doing Business halyqaralyq reıtınginde Qazaqstanda bıznes júrgizý jaǵdaıyn jetildirý boıynsha júrgizilip jatqan jumys oń baǵa aldy. Búginde reıtıngide Qazaqstan 25-shi orynda tur. Endi osy pozıtsııany jaqsartý mańyzdy», - dedi R. Dálenov onlaın rejımde halyq aldynda esep berý barysynda.

Osy oraıda ol bul sharalar tek kórsetkishter úshin jasalmaıtynyn atap ótti.

«Bul qadamdar aıasynda joǵary pozıtsııany saqtaý kásipkerlikti damytý úshin zańnamany turaqty jetildirýdi bildiredi», - dedi mınıstr.

Onyń sózine qaraǵanda, kósh bastap turǵan ındıkatorlar arasynda sharttardy oryndaýdy qamtamasyz etý, ınvestorlardy qorǵaý men kásiporyndardy tirkeý baǵyttary bar.

«Sonymen qatar, halyqaralyq saýda boıynsha, elektr energııasymen qamtamasyz etý júıesine qosylý baǵyttaryn jaqsartý kerek. Osy baǵyttaǵy jumystar jalǵasýda», - dedi R. Dálenov.