Rýslan Dálenov 5G jelisi týraly: Hırýrgter operatsııany qashyqtyqtan jasaıtyn bolady
NUR-SULTAN. QazAqparat – Parlament Májilisiniń jalpy otyrysynda Ulttyq ekonomıka mınıstri Rýslan Dálenov elimizde «besinshi býyn» baılanys jelisin (5G) engizý jobasy týraly túsinik berdi, dep habarlaıdy QazAqparat tilshisi.
Budan buryn habarlanǵandaı, búgin Májilis depýtattary «Qazaqstan Respýblıkasy men Soltústik ınvestıtsııalyq bank arasyndaǵy Soltústik ınvestıtsııalyq banktiń Qazaqstandaǵy qyzmetin retteıtin negizdemelik kelisimdi ratıfıkatsııalaý týraly» zań jobasyn maquldaǵan edi. Osy oraıda jalpy otyrys barysynda depýtattar Soltústik ınsvestıtsııalyq banktiń qarjylandyrý talaptaryna saı keletin naqty ınvestıtsııalyq jobalar týraly surady.
Óz kezeginde Ulttyq ekonomıka mınıstri Rýslan Dálenov búginde ınvestıtsııalyq jobalar pýly qurylǵanyn atap ótti. «Kazakh Invest» ulttyq kompanııasynyń málimetterine súıensek, jobalar tizbesi jınaqtaldy. Jalpy, jobalar pýly 1 mlrd eýrodan astam qarjyny qurady. Al naqty jobalar kelissózder barysynda aıqyndalady, ıaǵnı kelissózder kezinde stavkalar men jeńildikti kezeń, qazaqstandyq qamtý úshin basymdyqtar jáne ózge de talaptar belgili bolady.
«Qazir pysyqtalyp jatqan jobalar arasynda 5G jelisin engizý qamtylǵan. Investor Fınlıandııadan, ıaǵnı «Nokia» kompanııasy tarapynan bolady. Bul rette 500 mln dollarǵa jýyq qarjy eskerilgen. 5G jelisi jasandy ıntellektiń mańyzdy elementi. Osy oraıda hırýrgter operatsııany jyldamdyǵy joǵary ınternet arqyly qashyqtyqtan jasaı alady», - dedi mınıstr.
Budan buryn habarlanǵandaı, Qazaqstan 5G jelisin engizýde álem elderiniń ondyǵyna kiredi dep kútilýde.
Atap aıtqanda, Nur-Sultan, Almaty jáne Shymkentte 5G jelisi boıynsha qanatqaqty joba qolǵa alyndy.
