Rýslan Dálenov 2020 jylǵy JІÓ ósimine boljam jasady

NUR-SULTAN. QazAqparat - 2020 jyly Qazaqstannyń jalpy ishki óniminiń naqty ósimi 4,1 paıyzdy quraıtyn bolady. Bul týraly búgin Úkimet otyrysynda elimizdiń 2020-2024 jyldarǵa arnalǵan áleýmettik-ekonomıkalyq damý boljamyn tanystyrǵan QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Syrtqy parametrlerdiń ózgerýine baılanysty Qazaqstan ekonomıkasy damýynyń yqtımaldy úsh stsenarııi qaraldy. Boljam men bıýdjettik parametrlerdi qalyptastyrý úshin bazalyq stsenarıı negizge alyndy. Ol munaı baǵasyn 55 dollar kóleminde kózdeıdi. Jalpy ishki ónimniń naqty ósýi 2020 jyly 4,1 paıyz deńgeıinde boljanyp otyr. 2024 jyly ol 4,7 paıyzǵa jetedi. Ortasha jyldyq ósý qarqyny 5 jylda 4,4 paıyzdy quraıdy», - dedi mınıstr.

Onyń atap ótýinshe, ınvestıtsııalar ekonomıkalyq ósýdi qoldaýdyń mańyzdy faktoryna aınalady. Salalyq bóliniste negizgi ósim shıkizattyq emes sektoryna tıesili bolady. Bul - óńdeý ónerkásibi, qyzmet kórsetý salasy jáne qurylys. Atalǵan salalardyń ortasha ósimi 4,7 paıyzǵa jetedi. Jalpy ishki ónimniń ósýindegi salymy 3,5 protsenttik tarmaqty quraıdy.

«Munaı óndirý kólemi 2020 jyly 90 mıllıon tonnaǵa, 2024 jyly 100 mıllıon tonnaǵa deıin ósedi. Óndirýdiń ósýi Teńiz, Qarashyǵanaq, Qashaǵan ken oryndaryn keńeıtý, sondaı-aq Teńizdegi ken oryndaryn paıdalanýǵa berý esebinen bolady. Nomınaldy jalpy ishki ónim 2020 jyly 75 trıllıon teńgeni, al 2024 jyly - 106 trıllıon teńgeni quraıdy. Jan basyna shaqqandaǵy jalpy ishki ónim 2020 jyly 10,5 myń dollardy qurasa, 2024 jyly ol 14,3 myń dollaryna deıin ulǵaıady», - dedi Rýslan Dálenov.