Rýslan Berdenovtyń júrgizýshisi atys týraly sotta ne aıtty

ShYMKENT. KAZINFORM — Shymkent qalasynda ótip jatqan atyshýly is boıynsha sot protsesinde Rýslan Berdenovtyń júrgizýshisi Meırambek Qalymbetov kýálik berdi.

Aldynda júrgizýshiden 11 tamyzda jaýap alynady dep habarlanǵanymen ol sol kúngi sotta kórgen-bilgenin aıtyp bergen.

Aıtýynsha, atys bolǵan kúni ol ákimdik ǵımaratynyń dál aldynda kólikpen kútip turǵan. Jábirlenýshi kólikke minip úlgermeı, sol sátte oq atylǵan.

— Bastyqty kútip otyrdym. Kele jatqanyn aınadan kórdim. Otyrǵan boıda atys daýsyn estidim. Abdyrap qaldym. Ol kezde kólik «skoroste» turdy, aıaǵym tejegishten sál ketkende kólik ózdiginen júrip ketti de, bordıýrge baryp toqtady. Shokta boldym, — dedi Meırambek Qalymbetov sotta.

Sondaı-aq ol, Rýslan Arysbekulyn óltirip qoıa ma dep qoryqqanyn aıtty. Sodan 30-40 shamasyndaǵy jyldamdyqpen kelip aıyptalýshyny soqqan.

— Toqtatýǵa tyrystym. Qatty soqqy bolǵan joq, jaı soqqy boldy. Bul kisi artqa qaraı sheginip qulady. Men artynan toqtatý maqsatynda júgirip bardym. Ustaý úshin, — dedi Qalymbetov.

Júrgizýshiniń aıtýynsha, ol jaǵdaıdy toqtatpaq bolyp árekettengen, biraq sol sátte ózine beıtanys bir adam kelip, kúdiktini jerge qulatyp, shynjyr salǵan.

Bul arada aıta ketetin bir jaıt — júrgizýshi jaraly jábirlenýshige birden kómek kórsetýge tyrysqanyn da aıtty.

— Rýslan Arysbekulynyń ústi qanap jatty. Tizerlep otyryp qaldy. Qolynyń qanaǵanyn kórdim. Kostıýmin sheship, qandy toqtatpaq boldym. Fýtbolkamdy qanǵa basyp turdym. Eki qyz kelip, «jedel járdem shaqyryńdar» dep jatty, — deıdi júrgizýshi.

Meırambek Qalymbetov sonymen qatar, birneshe oqtyń óz jaǵynan, ıaǵnı kóliktiń janynan atylǵanyn naqtylady. Al atyp jatqan sottalýshyny kólik terezesiniń mańynda kórgen.

Oqıǵa kezinde kúızelis jaǵdaıynda bolǵanyn birneshe ret qaıtalaǵan kýáger shynaıy kórgen-bilgenin ǵana aıtýǵa tyrysqanyn jetkizdi. 

Sonymen qatar, ol oqıǵanyń aldynda Berdenov pen Jıembaı arasynda eshqandaı kelispeýshilik nemese janjal baıqamaǵanyn málimdedi.

Sot barysynda aıyptalýshy «Menen saǵan qaýip tóndi me?» — dep surady. Kýáger bul suraqqa «joq» dep jaýap berdi.

Aıta keteıik, budan buryn Shymkenttegi qylmystyq ister jónindegi mamandandyrylǵan aýdanaralyq sotta qala ákiminiń orynbasary Rýslan Berdenovke qastandyq jasaý isi boıynsha basty sot protsesi bastalǵanyn jazǵan bolatynbyz.

Buǵan deıin aıyptalýshy sotta oqıǵanyń qalaı bolǵanyn aıtyp berdi. 

Shymkent ákiminiń orynbasaryna qastandyq jasalǵany 21 sáýirde málim bolǵan. Ol aýyr jaraqat alyp, aýrýhanaǵa tústi.

Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan bolatyn.