Rýslan Berdenovke jasalǵan qastandyqtyń sebebi aıtyldy
ShYMKENT. KAZINFORM – Shymkent qalasy ákiminiń orynbasary Rýslan Berdenovke jasalǵan qarýly shabýyldyń sebebi – qyzmettik kelispeýshilik negizinde týyndaǵan qasaqana qylmystyq nıet bolǵany belgili boldy. Bul týraly aldyn ala sot tyńdaýy barysynda aıyptaý aktisi jarııalanǵan kezde aıtyldy.
Іs materıaldaryna sáıkes, Shymkent qalalyq qurylys basqarmasynyń qurylys nysandaryn baqylaý bóliminiń basshysy A.M.Kenjebekov aıyptalýshy E.J.Jıembaıǵa telefon arqyly habarlasyp, qala ákiminiń orynbasary R.A.Berdenovtiń nusqaýy boıynsha «Turǵyn úı Shymkent» JShS basshysy qyzmetinen óz erkimen ketý týraly ótinish jazýǵa májbúr ekenin aıtqan.
Aıyptaý tarapynyń málimdeýinshe, dál osy áńgimeden keıin E. Jıembaıda qylmystyq nıet paıda bolǵan.
21 sáýir kúni – shabýyl jasalǵan kúni – aıyptalýshy qala ákimdigi ǵımaratyna jubaıyna tıesili «Hyundai Tucson» avtokóligimen kelgen. Kóliktiń júk salǵyshynda «Saıgak» markaly ańshy myltyǵy bolǵan. Ol buǵan deıin ishimdik satyp alyp, ony kólik salonynda ishken.
R. Berdenovtiń ákimdik ǵımaratynan shyǵýyn kútip turǵan E. Jıembaı oǵan qaraı bes ret oq atqan. Jábirlenýshi jerge qulaǵan sátte, aıyptalýshy jaqyndap baryp, baqylaý úshin sońǵy oqty atpaq bolǵan. Alaıda myltyqtaǵy oq-dári taýsylyp qalǵandyqtan, bul áreketin júzege asyra almaǵan. Dál sol kezde júrgizýshi áreket etip, qaıǵyly jaǵdaıdyń odan ári ýshyǵýyna jol bermegen.
Eske salaıyq, búgin ótken aldyn ala sot tyńdaýy barysynda jábirlenýshiniń resmı ókili Rýslan Berdenovtiń densaýlyǵyna baılanysty sot protsesine qatysa almaıtynyn habarlady. Alaıda sýdıa Ábinur Qarabaev ony 6 tamyzǵa belgilengen sot otyrysyna jeke kelýge mindettedi. Sondaı-aq sotqa aıyptalýshynyń áıeli de kýá retinde shaqyrylatyn boldy.
Aıyptalýshy Ernar Jıembaı alqabılerdiń qatysýynan bas tartyp, sot zalynda beınejazba júrgizýge tyıym saldy. Onyń múddesin tórt advokat, onyń ishinde qoǵamdyq qorǵaýshy retinde qatysyp otyrǵan ákesi de qorǵaýda. Sot otyrysy barysynda Jıembaı tergeý kezinde ózine qysym jasalǵanyn málimdedi.