Rýslan Berdenovke jasalǵan qastandyq: sotta kúdiktiniń qalaı ustalǵany aıtyldy

ShYMKENT. KAZINFORM – Shymkent qalasy ákiminiń orynbasaryna jasalǵan qastandyqqa qatysty alǵashqy sot otyrysy aıaqtaldy. 

Úsh kýágerden jaýap alyndy. Kelesi aptadan bastap sot otyrystary aptasyna eki ret – dúısenbi jáne sársenbi kúnderi ótetin bolady.

Sot otyrysynda kýáger retinde polıtsııa ınspektory, maıor Janarys Aıtpaev jaýap berdi.

Onyń aıtýynsha, 21 sáýir kúni keshki saǵat 20:00 shamasynda ol dosymen birge alleıada bolǵan. Arada 40–45 mınýttaı ýaqyt ótken soń, sol jerge bir avtokólik kelip toqtap, ishinen 30 jastaǵy Ernar Jıembaı túsken.

Janarys dosymen qoshtasyp, ketpek bolǵan sátte kenetten oq atysyn estigen. Alystan Jıembaıdyń qarý kezep atqanyna kýá bolǵan. Sol sátte kólik júrgizýshisi ony zalalsyzdandyrý maqsatynda qaǵyp ótkenin kórgen.

Kýágerdiń aıtýynsha, oqıǵa bes mınýttyń ishinde bolǵan. Janarys shamamen 100 metr júgirip baryp, Jıembaıdy jerge qulatyp, polıtsııa qyzmetkerleri kelgenshe ustap turǵan.

Osydan keıin ol kúdiktini oqıǵa ornyna kelgen polıtsııa qyzmetkerlerine tapsyrdy da, ózi ketip qalǵan.

Sýdıa Janarystan polıtsııada onyń batyl áreketteri úshin alǵys hat nemese marapat túrinde qandaı da bir resmı baǵalaý bolǵan-bolmaǵanyn naqtylap surady.

Maıor bul áreketi úshin ázirge eshqandaı resmı alǵys bildirilmegenin aıtty.

Kýágerlerden jaýap alý aıaqtaldy.

Kelesi sot otyrysy 13 tamyz kúni saǵat 10:00-de ótedi. Bul kúni Rýslan Berdenovtiń júrgizýshisinen jaýap alý josparlanyp otyr.

Aıta keteıik, budan buryn Shymkenttegi mamandandyrylǵan aýdanaralyq qylmystyq ister jónindegi sotta qala ákiminiń orynbasary Rýslan Berdenovke qastandyq jasaý isi boıynsha basty sot protsesi bastalǵanyn jazǵan bolatynbyz. 

21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi. 

Rýslan Berdenovtiń aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.