Rýslan Berdenovke jasalǵan qastandyq: Qylmystyq is boıynsha tergeý aıaqtaldy

TÚRKІSTAN. KAZINFORM - Shymkent qalasy ákiminiń orynbasary Rýslan Berdenovke jasalǵan qastandyq isi boıynsha tergeý aıaqtaldy. Qazir protsess qatysýshylary qylmystyq istiń materıaldarymen tanysyp jatyr.

Kúdikti Ernar Jıenbaı buǵan deıin «Turǵyn úı Shymkent» JShS dırektorynyń mindetin atqarǵan. Ol 21 sáýir kúni oqıǵa ornynda, ıaǵnı ákimdik ǵımaratynyń janynda ustaldy. Sol kúni sot ony eki aı merzimge qamaýǵa alý túrindegi bultartpaý sharasyn sanktsııalady. Bastapqyda qylmystyq isti sotqa 21 maýsymda tapsyrý josparlanǵan bolatyn.

— Tergeý aıaqtaldy, qazirgi ýaqytta taraptar istiń materıaldarymen tanysyp jatyr. Odan keıin is prokýratýraǵa joldanyp, sosyn sotqa jiberiledi. Sot qaraýy bastalǵan joq, — dep túsindirdi sottan.

Shymkent qalasy Polıtsııa departamentiniń málimetinshe, tergeý Qazaqstan Respýblıkasy Qylmystyq kodeksiniń eki babyna sáıkes júrgizilip jatyr.

- QR Qylmystyq kodeksiniń 24-babynyń 3-bóligi — qylmysqa oqtalý (qylmysty oryndaýǵa baǵyttalǵan, biraq ózine baılanysty emes jaǵdaılardan tolyq oryndalmaǵan nıetti áreketter);

- QR Qylmystyq kodeksiniń 99-babynyń 2-bóliginiń 6-tarmaǵy — ómirge qaýipti ádispen adam óltirýge oqtalý.

Osy baptar boıynsha sanktsııa sot sheshimimen 15-ten 20 jylǵa deıin bas bostandyǵynan aıyrýdy nemese múlikti tárkilep nemese tárkilemeı ómir boıy bas bostandyǵynan aıyrýdy kózdeıdi.

Eske sala keteıik, 21 sáýir kúni Shymkent qalasy ákiminiń orynbasary Rýslan Berdenov ákimdik ǵımaratynyń mańynda jaralanǵan bolatyn. Ol aýyr jaraqattarmen aýrýhanaǵa jetkizilip, jedel túrde ota jasaldy.

Sondaı-aq Shymkent qalasynyń ákimdigi kúdiktiniń ustalýyna jáne tergeý barysyna qatysty resmı málimet berdi. Eki apta ótken soń Rýslan Berdenov aýrýhanadan shyǵarylyp, oqıǵadan keıin alǵash ret kópshilikke málimdeme jasady.