Rýslan Berdenovke jasalǵan qarýly shabýyl: Qylmystyq is eki bap boıynsha qozǵaldy

ShYMKENT. KAZINFORM — Kúdikti 15 jyldan bastap ómir boıyna bas bostandyǵynan aıyrylýy múmkin. 

Shymkent qalalyq polıtsııa departamentiniń málimetinshe, tergeý Qylmystyq kodeksiniń eki baby boıynsha júrgizilip jatyr.

— QK 24-baby 3-bóligi — Qylmys jasaýǵa týra baǵyttalǵan, tikeleı pıǵylmen jasalǵan áreketter (áreketsizdik), eger bul rette qylmys adamǵa baılanysty emes mán-jaılar boıynsha aqyryna deıin jetkizilmegen bolsa, qylmysqa oqtalý dep tanylady.

— QK 99-baby 2-bóligi 6-tarmaǵy — basqa adamdardyń ómirine qaýipti tásilmen jasalǵan kisi óltirýge oqtalý.

Atalǵan qylmystar úshin 15 jyldan 20 jylǵa deıingi merzimge nemese ómir boıyna bas bostandyǵynan aıyrý jazasy kózdelgen. Jaza múlikti tárkileýmen nemese onsyz, sottyń sheshimi boıynsha taǵaıyndalady.

Aıta keteıik, budan buryn Shymkentte qala ákiminiń orynbasary Rýslan Berdenovke qastandyq jasalan bolatyn. Kúdikti sheneýnikke qaraı úsh ret oq atqan. Oqıǵa saldarynan ákimdik qyzmetkeri jaraqat alyp, aýrýhanaǵa jetkizildi.

Al, dárigerler Rýslan Berdenovtyń ómirine qaýip tónip turmaǵanyn aıtty. Jasalǵan ota da sátti ótti.